Пезешкијан беше член на иранскиот парламент од 2008 година и потпретседател меѓу 2016 и 2020 година
Поранешниот пратеник Масуд Пезешкијан победи во вториот круг од претседателските избори во Иран освојувајќи 53,7 отсто (16 384 403 гласа), додека неговиот главен противник Саид Џалили добил 44,3 отсто (13 538 179 гласа).
Иако во првиот круг излезеноста во Иран беше рекордно ниска од 40 отсто, во вториот круг излегле 49,8 отсто од гласачите.
Пезешкијан беше член на иранскиот парламент од 2008 година и потпретседател меѓу 2016 и 2020 година.
„Ќе ја подадеме раката на пријателство на сите. Треба да го искористиме целиот народ на Иран за напредокот на земјата“,
рече Пезешкијан во своето прво обраќање по победата.
Изборите, на кои учествуваа околу 30 милиони Иранци, не беа набљудувани од ниту една меѓународно призната набљудувачка организација.
Пезешкијан, кој важи за умерен реформист, водеше кампања со помалку конзервативен став за носење хиџаб, по масовните протести во Иран поради смртта на Махса Амини во 2022 година која беше притворена од иранската полиција за морал.
Тој изјави дека сака подобри односи со Западот и да постигне нов нуклеарен договор.
Пезешкијан не се спротивставува на системот кој вели дека иранскиот врховен лидер ајатолахот Али Хамнеи е на врвот на иранската влада. Новиот претседател претходно ги поддржуваше Хамнеи и воената единица на Корпусот на гардата на Исламската револуција.
Поддржувачите на Пезешкијан за време на кампањата тврдеа дека победа на Џалили би значело воспоставување влада слична на Талибанците во Авганистан. Сеад Џалили е поранешен преговарач со Западот за иранската нуклеарна програма и се смета за тврдокорен политичар кој се залага за задолжително носење хиџаб.
Изборите во Иран се одржаа една година порано поради смртта на претседателот Ебрахим Раиси во хеликоптерска несреќа во мај.