Освен поддршка за предлог-амандманот на ССМ за раст на платите за 2 806 денари, на средбата со пратениците од ВМРО-ДПМНЕ, од КСС предложиле и амандман со кој би се обезбедила една милијарда денари како финансиска поддршка за вработените во приватниот сектор и тоа вработените со нето плата од 18 000 до 21 000 денари да земаат по 3 000 денари три месеци, а вработените со нето плата од 21 000 до 24 000 денари, три месеци по 2 000 денари
Освен Сојузот на синдикати на Македонија (ССМ), денеска и раководството на Конфедерацијата на слободни синдикати (КСС) оствари средба со пратеничката група на ВМРО-ДПМНЕ во врска со барањето на КСС за да се обезбедат средства во ребалансот на Буџетот за усогласување на платите во јавниот сектор, согласно порастот на минималецот.
Од КСС информираа дека дале поддршка на предлог-амандманот поднесен од Сојузот на синдикати за зголемување на платите за 2 806 денари, но дека побарале да бидат опфатени сите работници, без разлика дали се од јавниот или приватниот сектор.
Од КСС предложиле и амандман со кој би се обезбедила една милијарда денари како финансиска поддршка за вработените во приватниот сектор и тоа вработените со нето плата од 18 000 до 21 000 денари да земаат по 3 000 денари три месеци, а вработените со нето плата од 21 000 до 24 000 денари, три месеци по 2 000 денари.
„Причината за нашето вакво барање е огромната инфлација и неможноста на најсиромашните работници да ги сервисираат своите животни трошоци во месеците кои следуваат и да се подготват за тешката зима, а од друга страна и да се поттикне потрошувачката со што и бизнисот би имал корист“,
велат од КСС.
Оттаму додаваат дека пратеничката група на ВМРО-ДПМНЕ со разбирање ги прифатила нивните барања за поднесување на ваков амандман, а оти тој ќе биде поднесен сè со цел да се обезбедат парични средства од ребалансот на Буџетот и да се помогне на најсиромашните работници во државата.
КСС, воедно, ги повика сите пратеници да ја поддржат оваа иницијатива, со што, како што велат, ќе покажат вистинска грижа за работниците во земјава.
Со пратениците на ВМРО-ДПМНЕ, освен раководството на КСС, денеска средба остварија и претставници на Сојузот на синдикати на Македонија (ССМ) на која се разговарало за предлог-амандманот кој Сојузот го достави до пратеничките групи, а со чие усвојување би се утврдиле измените и дополнувањата во Буџетот за 2022 година, односно би се обезбедиле средства за зголемување на основната нето-плата на вработените во органите на државната и на локалната власт и други државни органи основани согласно со Уставот и со закон.