Не е само стручниот извештај на Лекарската комора во случајов, има и други наоди, вели министерот Филипче
Следната недела Министерството за здравство ќе ги разгледа сите извештаи од наодите во врска со случајот со родилката во струшката болница, на која при породувањето ѝ беа извадени повеќе органи, а за што Лекарската комора не констатира дека имало грешка.
„Јас пред некој ден спомнав што беше напишано во стручниот извештај и апсолутно не сакам да навлегувам во експертиза на колегите во делот на стручниот извештај, меѓутоа не е само стручниот извештај во случајов, има и други наоди. Тоа е наодот од Државниот санитарен и здравствен инспекторат, тоа е делот од тој наод којшто е пратен во Обвинителството и ние во текот на следната недела тука во Министерството ќе ги разгледуваме сите наоди од сите институции и ќе заземеме став“,
изјави денеска министерот за здравство Венко Филипче одговарајќи на новинарско прашање да го коментира заклучокот на Лекарската комора.
На прашањето зошто се тајна имињата на оние што стојат зад ваквиот заклучок на Лекарската комора, Филипче рече дека целокупниот извештај е јавен документ и нема никаква доверливост, но потенцира дека кога се работи за контрола на стручната работа, постојат и други механизми.
Струшкиот гинеколог и директор на болницата Мухамед Асани беше во фокусот на јавноста и во врска со случајот со родилката на која ѝ беа отстранети матката, бубрегот и јајникот. Според стручниот надзор на Лекарската комора, немало пропуст и лекарска грешка.
Во меѓувреме, предметот со неговата дива домашна ординација е во рацете на обвинителството и тоа ги проверува наводите од извештајот на Државниот санитарен и здравствен инспекторат (ДСЗИ).
Сомнежите што се испитуваат се за сторено кривично дело давање здравствени услуги без дозвола за работа, според членот 304а од Законот за здравствена заштита. Во моментов се прибираат искази, велат од ЈО.