Според Би-би-си, предизвикот на Трамп кон Бајден бил даден неколку часа откако неговата последна републиканска ривалка Ники Хејли се откажа од трката за републиканска номинација за Белата куќа
Поранешниот американски претседател Доналд Трамп го предизвика актуелниот претседател Џо Бајден на телевизиска дебата, пренесува Би-би-си.
По гласањето на „супервторник“ и двајцата ривали ги постигнаа очекуваните победи на внатрепартиските избори, а сега е сè поизвесно дека ќе бидат ривали во трката за шеф на Белата куќа, на изборите кои се закажани за ноември годинава.
Тие беа ривали и на изборите во 2020 година, кога победи Бајден, а потоа Трамп ги оспори резултатите.
Како што јавува Би-би-си, републиканецот Трамп изјавил дека ќе учествува на ТВ-дебата со Бајден, од Демократската партија, објавувајќи дека на тоа е подготвен, како што изјавил, во секое време и на кое било место.
Претставниците кои ја раководат кампањата на Бајден објавиле дека Трамп е гладен за внимание и, како што велат, се бори што повеќе да ја привлече јавноста.
Засега не е договорена телевизиска дебата меѓу Трамп и Бајден пред изборите во ноември.
Според Би-би-си, предизвикот на Трамп кон Бајден бил даден неколку часа откако неговата последна републиканска ривалка Ники Хејли се откажа од трката за републиканска номинација за Белата куќа.
„Важно е, за доброто на нашата земја, Џо Бајден и јас да дебатираме за прашања кои се многу важни за Америка и американскиот народ“,
објави Трамп на својата страница на социјалната мрежа Truth Social.
Според него, таквите дебати може да ги води Демократскиот национален комитет или Комисијата за претседателски дебати, која ги надгледуваше претседателските дебати во изминатите 30 години.
Трамп (77) постојано тврди дека Бајден (81) е премногу стар и заборавен за да дебатира со него.
Бајден, пак, на овие прозивки одговори дека Трамп е сенилен.
Кабинетот на Бајден не соопшти дали тој ќе учествува во дебата со Трамп, но му предложи на републиканецот да го гледа обраќањето на претседателот за состојбата на нацијата пред Конгресот.
„Ако е толку очаен да го види претседателот Бајден во ударниот термин, не мора да чека. Може да им се придружи на десетици милиони Американци кои во четврток вечер ќе го следат неговото обраќање за состојбата на нацијата“,
рече директорот за комуникации на кампањата на Бајден, Мајкл Тајлер.
Трамп беше жестоко критикуван откако одби да учествува во ТВ-дебати со неговите републикански ривали за номинацијата на партијата во Белата куќа во овој изборен циклус.
Тој тогаш тврдеше дека нема што да добие од ваквите настапи, посочувајќи ги анкетите кои, според него, говорат за неговото водство.
Бајден и Трамп дебатираа двапати за време на изборите во 2020 година.