Агенцијата за заштита на личните податоци (АЗЛП) објави дека по службена должност ќе проверува дали е Државната изборна комисија (ДИК) успеала да ги заштити личните податоци со оглед дека ноќта кога се броеја резултати имаше хакерски напад.
„Вечерта по одржувањето на вонредните парламентарни избори 2020 година, на 15 јули 2020 година, се случи инцидент каде одреден период не беа достапни веб страниците, односно веб услугите на ДИК. ДИК обработува голем број на лични податоци по својот обем и категории кои се поврзани со изборниот процес, а од кои одредени категории на лични податоци се достапни и по електронски пат. АЗЛП во врска со објавените информации за настанат инцидент, по службена должност ќе истражи и провери дали дошло да нарушување на безбедноста на личните податоци кои се обработуваат од страна на ДИК, односно дали обработката на личните податоци била, односно е во согласност со правилата на Законот за заштита на личните податоци“,
велат од Агенцијата.
Од Агенцијата потенцираат дека согласно членот 37 став (1) од овој закон во случај на нарушување на безбедноста на личните податоци, контролорот (во конкретниот случај ДИК) не подоцна од 72 часа откако дознал за истото е должен да ја извести АЗЛП, освен ако не постои веројатност нарушувањето на безбедноста на личните податоци да создаде ризик за правата и слободите на физичките лица, што Комисијата не го направила. Бидејќи ДИК не пратила известување, од оваа Агенција велат дека се можни две сценариja: или не е нарушена безбедноста на личните податоци или ДИК не постапила и не ги известила во рокот од 72 часа.
Вчера во ДИК влегоа и обвинители и истражители од Одделот за организиран криминал и корупција со цел да стасаат до документацијата за договорот меѓу ДИК и компјутерската фирма што ја изработи апликацијата за следење на резултатите на изборите.
По хакерскиот напад, кога падна веб-страницата од ДИК случајот го пријавија и во МВР.