Постои предлог во Собранието, потпишан од неколку пратеници, координаторите на четирите најголеми партии, но она што можам да го кажам е дека тоа не значи дека во таа форма конечно ќе биде донесен, рече министерот за правда во гостување на ТВ Канал 5
Ќе има промени во текстот на Изборниот законик, ќе има некои подобрувања. Начално е постигната согласнот меѓу големите четири партии во која насока да се оди и очекувам веднаш по одморите, на средина на август, овој закон да биде изгласан во Собранието, рече министерот за правда, Бојан Маричиќ, во интервју за „Канал 5“.
„Изборниот законик е комплициран за донесување и секогаш сме го носеле со консензус. Во овој момент се уште се работи на тој текст. Постои предлог во Собранието, потпишан од неколку пратеници, координаторите на четирите најголеми партии, но она што можам да го кажам е дека тоа не значи дека во таа форма конечно ќе биде донесен. Има уште време, иако не премногу, но верувам дека по одморите ќе биде донесен“,
рече Маричиќ.
Министерот посочи дека идејата е во законот да се имплементираат сите препораки на ОБСЕ-ОДИХР и да се направат подобрувања на процесот во интерес на демократизација на изборите и поголемо учество на граѓаните.
На забелешките од партијата Левица дека за овој закон се договараат само најголемите партии, а не и помалите, Маричиќ рече дека вообичаено Изборниот законик досега се договарал токму меѓу четирите најголеми партии кои имаат членови во Државната изборна комисија.
„Овој пат имаше работна група во Министерството за правда, која направи основен текст, потоа четирите најголеми партии го разгледаа и дадоа свои забелешки. Го изменија текстот и потоа текстот беше консултиран за првпат најинклузивно што е можно со помалите партии во Собранието, кои немаат пратеничка група, меѓу кои и Левица“,
вели Маричиќ.
Министерот подвлече дека во однос на Изборниот законик и ОБСЕ и претседателот го кажале своето мислење, но како што рече, подобро е да се почека за да се увиди во која форма ќе биде донесен и со кои решенија за да може потоа да се коментираат наредните постапки. Тој напомена дека консултациите траат постојано, односно темата е отворена веќе неколку месеци.
„Во оној момент кога ќе имаме законски текст кој ќе биде усогласен и за кој ќе сметаме дека ќе биде подобар од овој што е во моментов во Собранието, ќе биде повторно предложен и тој ќе биде изгласан. Меѓутоа, во секој случај, добро е да има измени на Изборниот законик, во смисла на препораките на ОБСЕ, пред се, но и некои други решенија кои се битни за изборниот процес пред да одиме на избори во октомври“,
додаде тој.