Патот беше долг, но заслуживме. Бидете горди, знамето на Република Северна Македонија е симбол на сигурна, безбедна и просперитетна иднина на нашата земја, порача премиерот Оливер Спасовски откако заврши свечената церемонија на кревање на државното знаме пред седиштето на НАТО во Брисел.
Членството во НАТО, Спасовски го оцени како најголемиот успех на земјава од независноста до денес, а церемонијата на подигнување на знамето тој и министрите ја гледаа преку видеопренос од свечената сала во Владата во Скопје поради пандемијата со коронавирусот.
Денеска водиме битка со короната, рече премиерот, но ќе си дозволиме за миг и да се израдуваме.
„Многу бргу по независноста тргнавме во остварување на оваа стратегиска цел. Во последните три години ги направивме клучните реформи и ги донесовме историските одлуки. Со големите одлуки станавме подобра држава и подобро општество, а наградата стигна заслужено. Бидете уверени дека ќе ја добиеме битката со коронавирусот и ќе продолжиме кон другата стратегиска цел, Европската Унија“,
рече Спасовски.
Тој на крајот од обраќањето рече дека должност е да им се оддаде признание на сите што се вградиле во евроатлантскиот процес, а особено го истакна неговиот партиски лидер и претходник на премиерската функција, Зоран Заев.
„На сите нив им упатува изрази на бескрајна почит и благодарност. Ова посебно се однесува на претходниот претседател на Владата, Зоран Заев, за неговото неуморно залагање и храбри одлуки. Овој ден немаше да се оствари и без поддршката на нашите сојузници: САД, земјите членки на НАТО и нашите соседи. Среќни сме што сме заедно со нив, поврзани со солидарноста и единството“,
рече Спасовски.
Паралелно, со церемонија на кревање на нашето државно знаме во седиштето во Брисел, знамето се крена и во седиштето на НАТО-командата во Норфолк, како и во главната команда во Монс.
*Поврзана вест: Македонското знаме се развеа пред НАТО во Брисел: Сега Северна Македонија ги има најдобрите пријатели и сојузници, порача Столтенберг