Вработените кои сè уште не се вакцинирани, треба да го направат тоа за 60 дена. Вакцината ќе биде услов и за новите вработувања во компанијата
По компаниите „Фејсбук“ и „Гугл“, и „Волт Дизни“ се запиша на листата американски компании кои од своите вработени побара да бидат вакцинирани против коронавирусот.
На таков чекор, велат од компанијата, се одлучиле затоа што вакцината нуди најдобра заштитата од ковид-19.
„Во компанијата ’Волт Дизни‘, безбедноста и благосостојбата на нашите вработени за време на пандемијата беше и продолжува да биде врвен приоритет. За таа цел, и врз основа на најновите препораки од научници, здравствени работници и наши медицински професионалци дека вакцината против ковид-19 обезбедува најдобра заштита од тешка инфекција, бараме сите наши вработени да бидат целосно вакцинирани“,
соопштија од компанијата.
На вработените кои сè уште не примиле вакцина, а физички одат на работа во просториите на компанијата, им е даден рок од 60 дена да го направат тоа. Истото ќе треба да го направат и оние кои работат од дома, пред да се вратат на работа со физичко присуство.
Вакцината ќе биде услов и за вработување, сите нововработени пред да тргнат на работа ќе мора да бидат целосно вакцинирани.