Посетата на министерката Петровска на Софија, според бугарските медиуми, е продолжение на контактите на високо ниво започнати на почетокот на годината во обид за нормализирање на односите меѓу двете земји во контекст на евроинтеграциите на Република Северна Македонија и ветото наметнато прво од Франција, а потоа и од Бугарија од 2020 година
Новата безбедносна реалност на европскиот континент повикува на сплотеност и соработка, а нашата безбедност лежи во колективната безбедност на нашите сојузници во НАТО, бидејќи ние сме НАТО, изјави денеска министерката за одбрана Славјанка Петровска, која е во официјална посета на Софија.
Како што информира Министерството за одбрана, Петровска порача дека заедничката научена лекција во изминатите три месеци е дека само кога сите сојузници во НАТО зборуваат во еден глас, кога стоиме заедно и работиме заедно, само така можеме да ја гарантираме нашата безбедност.
Министерката ја поздрави одлуката на Бугарија да биде домаќин на мултинационалната борбена група на НАТО.
Имајќи ја предвид безбедносната ситуација во Европа, Петровска порача дека она што во моментов е неопходно е целосна интеграција и заедништво.
„Членството на Северна Македонија во НАТО значеше зацврстена безбедност и стабилност не само за нашата држава, туку и за нашите соседи, вклучувајќи ја и Бугарија која на дел од својата западна граница има земја – сојузник“,
истакна министерката Петровска.
Таа порача дека на претстојниот министерски состанок на НАТО, како и на лидерскиот самит во Мадрид ќе се разговара за неколку важни документи за Алијансата – агендата НАТО 2030 и новиот стратегиски концепт на Алијансата. Информираше дека Владата останува посветена на правичното распределување на трошоците во рамките на Алијансата и стабилниот раст на буџетот за одбрана кој до 2024 година треба да го достигне нивото на два проценти од бруто-домашниот производ.
Министерката Петровска денеска во Софија ќе се сретне со својот бугарски колега, министерот Драгомир Заков, а во Собранието на Бугарија ќе има средба и со раководството на парламентарната комисија за одбрана.
Таа ќе се сретне и со двајца офицери на Армијата на Република Северна Македонија кои во моментов се на високо воено школување на Воената академија „Генерал Ѓорѓи С. Раковски“ во Софија.
Посетата на министерката Петровска на Софија, според бугарските медиуми, е продолжение на контактите на високо ниво започнати на почетокот на годината во обид за нормализирање на односите меѓу двете земји во контекст на евроинтеграциите на Република Северна Македонија и ветото наметнато прво од Франција, а потоа и од Бугарија од 2020 година.