Таа нагласила и дека одлагањето на почетокот на пристапните преговори носи ризик и од хибридни закани
За време на Стратешкиот дијалог помеѓу Северна Македонија и САД во Вашингтон, министерката за одбрана, Славјанка Петровска, во заедничко интервју со заменик-помошничката на секретарот за одбрана на САД, Лора Купер, истакна дека Белата куќа е загрижена поради бугарското вето за почеток на преговорите на земјата со ЕУ.
„Споделивме загриженост за застојот во европската интеграција на нашата држава и се разбира недвосмислено ја добивме поддршката дека тој процес треба да се забрза, осносно дека Република Северна Македонија треба да го добие датумот и дека треба да ги отпочне преговорите“,
вели Петровска во интервјуто.
Министерката истакнала и дека предолгото занимавање со ова прашање или тактизирање може да влијае на безбедносната состојба на регионот.
„Го спомнав ветото неколку пати во контекст на безбедносната состојба. Затоа што се додека има отворени прашања тоа значи дека државите се занимаваат со тие отворени прашања, а не со она што е круцијално. Мислам дека предолгото занимавање со ова прашање или тактизирање со ветото, особено во условите кои ги имаме сега на европското тло, а тоа е воената агресија врз Украина, остава простор за влијанија на трети држави кои, не секогаш, односно најчесто, не се добро наклонети кон состојбите. Поголема акција, поголема вклученост од сите страни ќе биде од бенефит за сите“,
смета Петровска.
Таа посочува и дека одлагањето на почетокот на пристапните преговори носи ризик и од хибридни закани.
„Хибридните закани беа присутни во Северна Македонија и предходно, но, се разбира дека со започнувањето на руската инвазија врз Украина, и поради ставовите кои Владата на Северна Македонија ги има кон ова прашање, а тоа е јасна осуда и недвосмислена поддршка на Украина во оваа борба, се засилија кон Северна Македонија, кон институциите и се разбира кон одредени министри, политичари, или пак јавни личности кои го изразуваат тој свој став“,
истакна Петровска.