Дополнителната заменик-министерка останува на изјавата дадена синоќа во емисијата „360 степени“ на ТВ Алсат дека италијанските власти му реагирале на министерот Чулев за пробивање на акцијата додека таа се уште траела
„Ако ги прашате нашите сојузници во Италија ќе добиете поинаков одговор од тоа што именуваната го изјавува на ‘360 степени’“, рече претходно лидерот на ВМРО-ДПМНЕ
Дополнителната заменик-министерка за внатрешни работи, Славјанка Петровска, реагира на тврдењето на лидерот на ВМРО-ДПМНЕ, Христијан Мицкоски, дека не се точни нејзините наводи за реакции од италијанските власти до министерот Наќе Чулев за издавање информации во јавноста за акција што се уште била во тек. Станува збор за меѓународната акција, раководена од италијанското јавно обвинителство, за сузбивање шверц на кокаин, од кој дел требало да заврши во земјава.
„Зошто да го чекаме 12 април, како што вели Мицкоски. Најдобро е да зборуваме денеска, акцијата е веќе завршена. По 12 април треба да продолжиме со реформите во полицијата и нема да имаме време да се враќаме на прашања што техничкиот министер избегнал да ги одговори. Со лаги и манипулации никаде не се стигнува“,
вели Петровска.
Ова е реакција на изјавата на Мицкоски од денешната прес-конференција во партиското седиште во која рече дека тврдењата на Петровска не се точни.
„Акцијата се случи по три години мораторим во борбата со криминалот и кокаинот. Тоа е информација од заменичката Петровска, но ако ги прашате нашите сојузници во Италија ќе добиете поинаков одоговр од тоа што именуваната го изјавува на ‘360 степени’“,
рече Мицкоски.
Тој ѝ порача на Петроска и останатите кои, според него, се молеле акцијата да биде неуспешна и брифирале погрешни информации за јавноста, дека на оваа тема ќе зборуваат погласно по 12 април.
Петровска: Неточни се тврдењата за мораториум во битката со криминалот
Петровска реагира и на тврдењето на Мицкоски за „тригодишен мораториум во борбата со криминалот и кокаинот“.
„Кога се спомува мораториум, дали намерно или од незнаење, се заборава, на пример, на меѓународната акција во која во Тетово беше откриена најголемата лабораторија за синтетичка дрога и беа запленети 500 000 таблети“,
вели Петровска.
Повод за реакцијата на лидерот на ВМРО-ДПМНЕ беше изјавата на Петровска од синоќешното гостување во „360 степени“.
„Со издавање на информациите однапред и соопштување дека станува збор за огромна акција од страна на министерот Чулев, се информирани и структури што не треба да бидат информирани во тој момент дека во нашата земја се одвива акција“,
рече синоќа Петровска.
Според неа, најголеми последици за акцијата имало во Босна и Херцеговина, каде исто како и во земјава, била следена контролирана пратка на кокаин.
„И на крај, бидејќи акцијата е пробиена, не е постигнат посакуваниот ефект ододносно она што италијанските власти очекувале дека ќе се случи“,
изјави дополнителната заменик-министерка во МВР.