Министерката за одбрана Славјанка Петровска говореше на отворањето на НАТО-конференцијата за комуникатори, чиј домаќин оваа година по првпат е Северна Македонија
Ширењето лаги е секогаш најлесниот пат по кој може да се допре до јавноста и да се влијае на неа, а ефектите од тие лаги се погубни. Затоа огромна е одговорноста на НАТО-комуникаторите во оваа војна да ја извојуваат победата на вистината и праведноста и трајните цивилизациски вредности.
Ова го истакна министерката за одбрана Славјанка Петровска во обраќањето на отворањето на НАТО-конференцијата за комуникатори, чиј домаќин оваа година по првпат е Северна Македонија.
Според неа, најважната силна политичка порака од овој форум е дека НАТО е воено-политички сојуз кој е буден и ги следи безбедносните предизвици од сите аспекти. Ги следи, реагира, но и се менува.
„На сите ни е добро позната воената доктрина која гарантира успех, а предвидува четири инструменти на национална моќ – информација, економија, дипломатија и војска. Вие, нашите НАТО-комуникатори држите еден од четирите инструменти на моќ во вашите раце. Секој од вас присутен овде, а ве има од речиси сите сојузнички земји, треба беспрекорно да ја заврши својата улога и на крај заеднички уште еднаш да кажеме дека НАТО, 73 години по неговото основање останува најмоќната Алијанса водена од вистинските вредности, а тоа се индивидуалната слобода, демократијата, човековите права и владеењето на правото“,
нагласи министерката Петровска.
Таа говореше и за институцијата која ја води – МО која трета година по ред е прогласена за најтранспарентна институција во земјата.
„Знаеме колку е важно да ги заштитиме националните интереси и безбедност на секој наш граѓанин, но знаеме и дека е подеднакво важно да одговориме на секое прашање кое е од интерес на јавноста бидејќи тоа е најдоброто оружје против лажните вести. Ги препознаваме опасностите од манипулација со информациите и лажните вести и затоа сме во процес на формирање на Центар за односи со јавност чија главна цел ќе биде токму борбата со дезинформациите. Со помош на НАТО овој Центар ќе стане додадена вредност на Алијансата во целина и голема предност што ќе биде од корист за нашата колективна потреба по вистината“,
рече Петровска.
На отворањето на Конференцијата се обрати премиерот Димитар Ковачевски, кој говореше за значењето на стратегиските комуникации во ерата на дезинформациите и хибридните напади.
На Конференцијата во Скопје ќе учествуваат околу 300 лица, а ќе бидат организирани неколку панели посветени на стратегиските комуникации, на што ќе претходат неколку работни групи во оваа област.