Во јануари починале 382 лица од кои 233 невакцинирани и околу 150 вакцинирани, но повеќето само со втора доза примена пред повеќе од шест месеци
Кумулативната смртност од ковид, од почетокот на болеста до денес, е три отсто, соопшти денеска претседателот на Комисијата за заразни болести Александар Петличковски.
Во јануари починале 382 лица од кои 233 невакцинирани и околу 150 вакцинирани, но повеќето само со втора доза примена пред повеќе од шест месеци.
„Според бројките од 1 до 31 јануари, од 382 починати 233 се невакцинирани, а околу 150 и нешто се вакцинирани, но најголем дел од вакцинираните се вакцинирани пред повеќе од шест месеци и немаат примено трета доза. Околу 30-тжина, пак, биле вакцинирани во рок помал од шест месеци“,
рече Петличковски.
Тој и денеска потенцира дека вакцините се оние кои штитат од хоспитализација и смрт и дека тоа се најпроверливи и научни факти.
„Граѓаните да примат трета доза, зашто такви нема меѓу починатите, а хоспитализирани се многу малку. Третата доза штити најмногу од хоспитализација и смрт. Гледаме деновиве шарлатански, нестручни дебати, но ова се податоците кои се проверливи и најсилни – вакцинацијата со трета доза е најдобра заштита“,
потенцира претседателот на Комисијата.
Тој потенцира дека ова е силна препорака до сите граѓани, особено помладите, додека кај повозрасните, оние над 70 години, одѕивот е добар.
Тој претходно на прес-конференцијата истакна дека епидемиолошката состојба во земјава е подобрена, но сè уште не може да се каже и дека е добра. Посочи дека е зголемен бројот на нови случаи меѓу децата од шест до 14 години.