Нападот доаѓа еден ден откако ирачкиот премиер Мохамед Шија ал-Судани се врати од посетата на Соединетите држави каде што се сретна со американскиот претседател Џо Бајден
Најмалку пет ракети биле истрелани вчера од ирачкиот град Зумар кон базата на американската армија во североисточна Сирија, изјавиле за Ројтерс два ирачки безбедносни извори и американски претставник.
Нападот од Ирак врз американските сили е прв од почетокот на февруари, кога групите во Ирак поддржани од Иран ги прекинаа нападите врз американските сили.
Тој доаѓа еден ден откако ирачкиот премиер Мохамед Шија ал-Судани се врати од посетата на Соединетите држави каде што се сретна со американскиот претседател Џо Бајден.
Во објава на групата Телеграм поврзана со Катаиб Хезболах се вели дека вооружените фракции во Ирак решиле да ги обноват нападите по речиси тримесечна пауза, откако забележале мал напредок во разговорите за ставање крај на воената коалиција предводена од САД во земјата.
Друга популарна група на Телеграм блиска до Катаиб Хезболах, Сабрин њуз, подоцна објави дека немало официјална изјава од фракцијата поддржана од Иран.
Американски официјален претставник, кој сакал да остане анонимен, изјавил дека повеќе од пет ракети биле истрелани од Ирак кон војниците во базата на коалицијата во Румалин, Сирија, но немало повредени американски лица.