Освен епидемија на болест, има и епидемија на лажни вести кои креваат паника кај населението, при што се создава ситуации кога не им се верува на официјални, туку на алтернативни продуценти на вести
Службите во кабинетот на претседателот на државата детектирале неколку обиди за организирано и планско ширење лажни вести за предизвикување паника, соопшти претседателот на државата Стево Пендаровски на денешната прес-конференција која ја посвети на ситуацијата со коронавирусот и мерките што се преземаат од властите за спречување на неговото ширење.
„Апелирам само за една работа: информирањето да биде од официјални извори. Во вакви ситуации, кога се случува епидемија на болест, има и епидемија на лажни вести кои креваат паника кај населението, при што се создава ситуации кога не им се верува на официјални, туку на алтернативни продуценти на вести. Нашите надлежни служби детектираа неколку обиди за планско ширење лажни вести за предизвикување паника. Не се работи за незнаење, туку за организирано и планско, со цел дополнително да е влоши ситуацијата и да се изгуби вербата во институциите“,
рече Пендаровски.
Пред два дена Владата како една од мерките го задолжи МВР да преземе соодветни мерки за сите лица што на социјалните медиуми објавуваат дезинформации, односно невистини, како и за медиумите што ги пренесуваат тие невистини.