Се задолжува Министерството за внатрешни работи во текот на денот да објави соопштение во кое ќе се наведе дека ќе се преземат соодветни мерки за сите лица кои на социјалните медиуми објавуваат дезинформации, односно невистини, како и медиумите кои истите тие невистини ги пренесуваат.
Ова го истакна Министерот за здравство, Венко Филипче на вечерашната прес-конференција.
„Институтот за јавно здравје е задолжен да подготви текст за пишаните и електронски медиуми во однос на почитување на препораките против Ковид-19. Ќе биде доставено до Министерството за здравство и понатаму процесуирано за објавување“, додаде тој.
Се препорачува на ЈП Македонска телевизија, редовно на дневна основа преку телевизиските канали и на собранискиот канал да ги емитува и објавува сите заклучоци, мерки и препораки усвоени од Владата на Република Северна Македонија за превенција од ширење на болеста Ковид-19.
Исто така, на државната новинаска агенција МИА, и се укажува редовно на дневна основа да ги објавува сите заклучоци, мерки и препораки против ширењето на оваа болест.
Министерството за внатрешни работи соопшти дека нема да има компромис во санкционирањето кон оние кои шират лажни вести на социјалните мрежи.
„Лажните вести што создаваат неоснована паника имаат долгосежни последици и врз општествената состојба, но и врз колективното здравје на граѓаните. Ваквите злоупотреби ќе бидат законски санкционирани затоа што на овој начин се вознемируваат граѓаните и се создава непотребна паника. Нема да има компромис во санкционирањето на оние кои свесно шират лажни вести,
велат од МВР.
Апелираме, додаваат, до медиумите и корисниците на социјалните мрежи да се повикуваат единствено на официјално објавените податоци од надлежните институции.