Не се соопштуваат повеќе детали од телефонскиот разговор, освен дека се размениле мислења за можноста да се постигне одржливо решение за европскиот развој на нашиот регион, а особено за интеграцијата на С Македонија во ЕУ
Претседателот Стево Пендаровски денеска телефонски разговарал со бугарскиот колега Румен Радев за, како што се посочува во соопштението од претседателскиот кабинет, позициите на двете држави во однос на условите за започнување преговори на Северна Македонија за членство во Европската Унија.
Во соопштението од кабинетот на Пендаровски не се изнесуваат повеќе детали од разговорите, освен дека двајцата претседатели размениле мислења за „можноста да се постигне одржливо решение за европскиот развој на нашиот регион и, особено, за интеграцијата на Северна Македонија во Европската Унија“.
Шефовите на државите разговарале за можноста за посета на Пендаровски на Бугарија, кога ќе се создадат соодветни услови.
Бугарскиот претседател оцени вчера дека почетокот на преговорите на С Македонија со ЕУ треба да се одложи се додека не се најде билатерално решение, бидејќи, како што нагласи, се поверојатно е дека бугарските предлози нема да бидат дел од преговарачката рамка, и покрај настојувањата на бугарската Влада.
Претходно, за време на неодамнешниот состанок на мешовитата Комисија во Скопје, Радев упати порака до експертскиот тим од Бугарија дека не може да се прават компромиси со историјата и јазикот или со барања за национални малцинства.