Очекувам одговорност и истрага во однос на случувањата во Пливачката федерација на Македонија и откажувањето на Охридскиот пливачки маратон за оваа година, рече претседателот Стево Пендаровски како одговор на новинарско прашање по отворањето на јубилејната 55. Летна школа на Меѓународниот семинар за македонски јазик, литература и култура при Универзитетот „Св. Кирил и Методиј“.
Како што рече, според она што бил информиран од новото раководство на Федерацијата, смета дека се работи за сериозни обвинувања.
Од новото раководство на Пливачката федерација на Македонија пред некој ден бев информиран дека тие веќе по една спроведена ревизија на работењето на претходното раководство и организатори на маратонот имаат поднесено извештаи или кривични пријави до Антикорупциската комисија и Основното јавно обвинителство. Очекувам, бидејќи станува збор за многу сериозни наводи од тоа што ми беше презентирано од новиот претседател на Федерацијата, дека тоа ќе биде земено веднаш во работа и нема да чекаме години и години да разбереме дали има таму навистина криминал, на што упатуваат ревизорските наоди и изјавите на новото раководство или нема ништо. Тој е таканаречен евентуално криминален дел на организацијата“,
изјави Пендаровски.
Тој забележа дека коментарите против него за откажувањето на Охридскиот маратон се предизвикани од политички мотиви.
„Јас знам дека има луѓе во опозицијата кои некои работи не ги разбираат. Не е возможно до толку да не разбираат и не прават разлика меѓу покровител, организатор и спонзор. Ја сум и денес покровител на Меѓународниот семинар за македонски јазик, литература и култура, но немам никаков контакт со финансиската конструкција на Семинарот. Имам уште неколку покровителства и тие ги преземав од моите претходници. Ние можеме неформално да помагаме барајќи од приватни фирми спонзорства, но од Кабинетот на претседателот никогаш не биле одделувани пари и средства за организација на која било манифестација на која претседателот е покровител“,
појасни Пендаровски.
Службите во неговиот кабинет, како што додаде, вчера проверувале десет години наназад и ниту еден денар не бил исплатен од буџетот на претседателот на државата за која било манифестација.