За реализација на најавеното „прочистување“ на судии и обвинители треба да се вклучи и меѓународната заедница, затоа што во спротивно ќе продолжат обвинувањата за реваншизам и политички притисок, порача претседателот на државата Стево Пендаровски во вечерашното интервју за „Само вистина“ на Канал 5.
„Знаејќи што сè се случувало, сметам дека треба да побараме меѓународна помош. Најдобро е да се свртиме кон докажани експерти, некаков Прибе кој би можел барем да го менаџира тој процес. Сега некој ќе рече „сакаме во ЕУ, а не сме способни сами да го направиме тоа“, но не ми е срам да побарам помош ако не сме способни за таква работа. Сè уште не сме способни.“
– изјави Пендаровски.
Коментирајќи го случајот „Рекет“, претседателот порача дека образложението на обвинителката Вилма Русковска дека во дел од доказите наводно се гледа Катица Јанева како се упатува кон претседателската вила, било некоректно.
„Мене ме зачудуваат формулациите кои ги користи обвинителката кога ги презентира доказите за случајот, вели дека „Јанева се упатила кон резиденцијата на претседателот“. Јас во тој период не сум живеел таму со семејството. Не е коректно да кажете нешто, а да не сте прецизни. Тоа се сензитивни докази и не може да шпекулирате така дека „одела во насока на“, можеби оди во насока на крстот на Водно.“
порача Пендаровски.