Шефот на државата, Стево Пендаровски, во вечерашното интервју на „360 степени“, зборуваше за впечатоците од денешните средби со еврокомесарот за проширување Оливер Вархеји и португалскиот министер за надворешни работи, Аугусто Сантос Силва, кои во Софија и Скопје понудија сет идеи за надминување на спорот со Бугарија.
Пендаровски вели дека португалскиот министер за надворешни работи, Аугусто Сантос Силва, иако не бил голем оптимист, денеска на нивната средба му рекол дека вратата не е затворена да има некаков напредок до крајот на португалското претседателство, односно не ја исклучува можноста да се раздвижат работите и до 22 јуни кога ќе се одржи Советот за општи работи на ЕУ.
„Силва рече дека за овој процес вратата не е затворена. Тој е искусен дипломат и долгогодишен политичар и тој така го опиша впечатокот по средбите денеска во Софија и во Скопје. Не е оптимист, меѓутоа, вели дека вратата не е затворена, а можеше да биде, ако предлогот бил одбиен како што јавуваа дел од медиумите и тука и во Бугарија“,
рече Пендаровски.
Тој потсетува дека политичката ситуација во Бугарија е многу комплексна, бидејќи во моментов има техничка Влада, а пред нив се и предвремени парламентарни избори в лето и претседателски избори наесен.