Претседателот Стево Пендаровски минатата недела во телевизиско интервју одговори на обвинувањата дека измените на Кривичниот законик се направени за враќање на поранешниот премиер Никола Груевски
Претседателот Стево Пендаровски можеше да ги спречи измените на Кривичниот законик и да го врати законот на повторно разгледување, но тој ги потпиша за да им се додвори на Димитар Ковачевски и на Али Ахмети, пишува ВМРО-ДПМНЕ во денешното соопштение.
Од партијата велат дека Пендаровски можеше да го врати законот на повторно разгледување, но тој реши слепо да ги исполнува командите на Ковачевски и Ахмети.
„Со потпис на измените на КЗ, Пендаровски буквално ги аболицира сите функционери од СДС и ДУИ кои изминатиов период ја злоупотребувале службената положба и овластување“,
се наведува во соопштението.
ВМРО-ДПМНЕ смета дека Пендаровски е директно виновен за хаосот во државата и деградирањето на правото.
Претседателот Стево Пендаровски минатата недела во телевизиско интервју одговори на обвинувањата дека измените на Кривичниот законик се направени за враќање на поранешниот премиер Никола Груевски.
„Ја оспорувам тезата дека измените на Кривичниот законик се направени за поранешниот премиер Никола Груевски да се врати. Не е вратен. Јас не го гледам. Сигурно и да има (некаков план за негово враќање) нема да оди преку мене. План А, план Б кај мене нема. Јас не сум дел од некаков план. Имаме еден месец закон во сила, потпишан указ. Каде е Груевски? Како е вратен? Каде е скриената амнестија? Медиумите шпекулираат дека Груевски ќе се врати со некое начелно правно мислење на Врховниот суд. Тогаш зошто се измените на Кривичниот законик, ако беше доволно да ги усвоиме па да се врати“,
праша Пендаровски.
Шефот на државата тврди дека во ниедна варијанта не би дал амнестија како претходниот претседател Ѓорге Иванов, но потврди дека преку посредници му пристапиле со барање за амнестија на Груевски од врвот на најголемата опозициска партија.
Зборувајќи за измените во Кривичниот законик, Пендаровски рече дека не се точни формулациите во медиумите дека паѓаат или застаруваат побрзо предметите на поранешното Специјално јавно обвинителство.
„Кога е направено СЈО? Во 2015 година? Осум години до сега. Колку осудивте до сега по тој член 353 како СЈО? Пред три години ги префрливте. Дали сакате да биде 28 години за застареност“,
вели Пендаровски.
Премиерот Димитар Ковачевски претходно посочи и дека „ако го прочитате Законот тогаш ќе видите дека нема никакво помилување и никаква амнестија за никого туку, напротив, има конкретизација на кривичните дела кои некој ги направил.
Со 48 гласа „за“, 36 „против“ и еден „воздржан“, Собранието на 6 септември годинава ги донесе измените и дополнувањата на Кривичниот законик.
Предлог-измените на Кривичниот законик кои Владата ги поднесе во Собранието по скратена постапка (со европско знаменце) предизвикаа лавина реакции во јавноста. Со нив, меѓу другото, се предвидува намалување на казните во членот 353 кој се однесува на злоупотреба на службената положба и овластување, кој најчесто се користеше за гонење службени лица и функционери, како и намалување на казните за делото злосторничко здружување од членот 394, односно наместо сегашните кои предвидуваат од една до десет години затвор, на една до три години затвор. Тоа повлекува и порано застарување на кривичните дела.