„Овој објект е врежан во колективната меморија на десетици генерации скопјани. За ова ќе се заложам уште во првите денови од мандатот“, рече актуелниот претседател и кандидат за уште еден мандат
Актуелниот претседател и кандидат за следен мандат Стево Пендаровски денеска на својот фејсбук-профил изрази жалење поради пожарот што утрово избувна во Универзалната сала во Скопје и повика надлежните институции да спроведат детална истрага за настанот.
„Да се спроведе соодветна истрага и да се санкционираат сите кои се одговорни за уништувањето на Универзалната сала, за овој значаен објект“,
напиша тој.
Пендаровски рече дека во следниот мандат ќе се заложи во најкус можен рок да биде обновен еден од симболите на Скопје и скопјани.
„Овој објект е врежан во колективната меморија на десетици генерации скопјани. За ова ќе се заложам уште во првите денови од мандатот“,
пишува во неговата објава на Фејсбук.
Утрово некаде по 9 часот избувна пожар во Универзалната сала во Скопје. Откако пожарникарски екипи интервенираа, беше локализиран два часа по избувнувањето.
Поради отежнатиот пристап кон објектот, пламените јазици ги гаснеа пожарникари со помош на кран. Како што објави ЦУК, гореше една од куполите на Универзалната сала.
Репортерите на „360 степени“ од терен известија дека паднала внатрешната дрвена кровна конструкција во една од куполите.
По пожарот што ја зафати Универзална сала, на Фејсбук се огласи и градоначалничката на Скопје, Данела Арсовска, која го повика Министерството за внатрешни работи итно да ги истражи причините и доколку се детектира дека во прашање е човечки фактор, институциите да покренат соодветни постапки за одговорност.
Министерката за култура Бисера Костадиновска-Стојчевска рече дека нема жртви и повредени во денешниот пожар што избувна во Универзалната сала, но има причинета материјална штета, за што како што рече, ќе треба дополнително да се утврди колкава е пред да се продолжи со градба на објектот.
Според неа, пред да се продолжи со какви било активности на Универзалната сала, заедно со стручни лица од Градежниот факултет и сите релевантни институции кои учествуваа и досега, ќе се утврди причината за штетата.
„Морам да потенцирам дека објектот е осигурен. Што значи дека од осигурувањето ќе се санира штетата што е направена и потоа ќе се продолжи со градба“,
вели таа.