Претходно министерот Спасовски наведе дека станува збор за лице со иницијали Л.А. на возраст од 34 години, што се поклопува со возраста на пејачот. Приведениот, рече министерот, веќе го признал делото
Уапсеното лице за палењето на влезната врата на бугарскиот културен центар „Иван Михаилов“ во Битола е популарниот македонски пејач Ламбе Алабаковски, кој неодамна се врати со семејството од САД во земјава.
Претходно денеска министерот за внатрешни работи Оливер Спасовски објави дека случајот со пожарот во бугарскиот центар „Иван Михајлов“, кој се случи во Битола на 4 јуни, е разрешен и веќе има едно приведено лице.
Спасовски наведе дека станува збор за лице со иницијали Л.А. на возраст од 34 години, што се поклопува со возраста на пејачот. Приведениот, рече министерот, веќе го признал делото.
„Се работеше деноноќно да се изнајде сторителот, се зедоа предвид сите докази, а по извршените службени разговори во изминатите денови, вчеравечер, со судска наредба, беше извршен претрес на две локации кои ги користи Л.А. (34) од Битола, при што се пронајдени и одземени предмети поврзани со кривичното дело, по што лицето е лишено од слобода. Уште еднаш покажавме дека единствената моќ што ја има секоја правна држава е моќта да го сузбие криминалот. И во овој сегмент нема „пардон“, нема заштитени лица – сите се еднакви пред лицето на законот, а секој којшто се огрешил – мора да одговара!“,
напиша Спасовски.
Влезот од клубот во Битола беше запален во утринските часови на 4 јуни, а случајот наиде на осуда од македонските и од бугарските власти. Увид на местото на настанот изврши и обвинител од Основното јавно обвинителство кој даде наредба за вештачење, како и за обезбедување на снимките од безбедносните камери во околината.
Поврзани вести:
- (ФОТО) Запален влезот на културниот центар „Ванчо Михајлов“ во Битола
- ОЈО: Издадени наредби за откривање на сторителите на опожарениот културен центар во Битола
- Ковачевски: Во 21 век со палење и опожарување не се постигнува ништо
- За Генчовска пожарот во Битола е подметнат намерно и ладнокрвно, очекува судството да си ја заврши работата
