Додека чекал резултати за ковид-19, пациентот не бил префрлен на инфективното одделение бидејќи, како што вели директорката Билјана Гагачовска, имал потреба од интернистички третман и уверува дека бил сместен во изолирана соба
Пациент сместен на интерното одделение во битолската болница од 11 април до синоќа чекал резултати за ковид-19, кои се покажале позитивни.
Случајот побуди револт кај дел од медицинскиот персонал. Еден од докторите од одделението алармираше за случајот на Фејсбук обвинувајќи дека и вработените и пациентите се изложени на ризик.
„Почитуван колега и министер Венко, четири дена чекавме резултати за лежечки пациент на интерно одделение, за сега во овие доцни часови да разберам дека е позитивен на ковид-19? Нема да се помирам и да ја прифатам оваа лакрдија. Слободно казнувајте ме колку сакате, но неспособните да ги смените веднаш. Таков гнев и револт чувствувам што не се опишува. Не ме исполнуваат аплаузи и немам потреба да си го хранам егото, барав да се водиме според правилата и да се заштитиме во секој поглед. Цел месец укажував дека не сме на ниво и еве дојде до тоа од коешто се плашев. Потфрливме и за ова барам да се одговара“,
пишува на својот профил на Фејсбук д-р Боби Трајковски.
Директорката на болницата, д-р Билјана Гагачовска, во изјава за „360 степени“, дописите во јавноста ги оцени како обид за манипулација и ширење паника.
Тврди дека пациентот цело време бил сместен во собата за изолација во интерното одделение, бидејќи такви соби има во сите оддели од болницата.
Освен со 1 доктор, 4 сестри и 1 болничар, кои, како што тврди, биле во контакт со него во заштитна опрема, други здравствени работници ниту пациенти, уверува Гагачовска, не се засегнати.
Медицинскиот тим што бил во контакт со пациентот сега оди во домашна изолација, а тој е префрлен на инфективното одделение.
„Пациентот беше примен на 10 април, без никакви симптоми и процедурално беше спроведен на преглед на психијатрија. Попладнето покажал температура, која оди во склоп на невролептичен синдром, но се постапуваше внимателно и персоналот со кој имаше контакт беше заштитен по протокол. Во документацијата на пациентот се покажа дека на 3 април примил ампуларна терапија од психијатриската болница во Демир Хисар, која ја примил во домашни услови, но беше префрлен во посебна соба за изолација и се третираше како сомнителен случај. На 11 веќе е земен брис. За секој пациент додека стигнат резултатите се постапува како сомнителен, но поради состојбата на пациентот не можеше да биде префрлен на инфективното одделение, затоа што имаше потреба од интернистички третман – во изолираната соба во интерното одделение. Пациентот немаше контакт со други пациенти и медицински лица“,
вели Гагачовска за „360 степени“.
Директорката вели дека освен медицинските лица кои биле во контакт со него, а се пратени во домашна изолација, денеска и целиот тим на интерното одделение се менува бидејќи и претходно персоналот работел по системот на ротација.
Таа ги повика во случајот да се вклучат и органите на прогонот бидејќи, како што вели, ова е вознемирување на народот и изнесување медицински податоци.
Инаку, болницата во Битола со одлука на Министерството за здравство стана регионален центар за лекување на пациенти со ковид-19.
Поврзани вести:
(ВИДЕО)„360 степени“ во зоната за ковид-19: Како се лекуваат позитивните и сомнителните пациенти