ТХП, која има еден пратеник што партиципира во досегашното парламентарно мнозинство, посочуваат дека продолжуваат да се залага за општество во кое хармонијата и еднаквоста се во прв план
Партијата за движење на Турците (ТХП), која има еден пратеник (Енес Ибрахим), кој е член на пратеничката група на коалицијата на СДСМ, се огласи денеска дека нема да соработува со политички чинители кои, како што се наведува, со своите анти-ЕУ, анти-НАТО, антидемократски ставови ја загрозуваат иднината на Северна Македонија.
„Како демократски, одговорен и транспарентен политички субјект, Партијата за движење на Турците, со будно око ги следи политичките случувања што можат да бидат исклучително значајни, но и фатални за иднината на нашата земја. Како сериозна парламентарна партија спремни сме да дадеме максимален придонес за надминување на оваа политичка криза. Но, ТХП никогаш нема да соработува со тие политички чинители кои со своите анти-ЕУ, анти-НАТО, антидемократски ставови ја загрозуваат иднината на Северна Македонија, а со своите радикални погледи и провокации разгоруваат етничка и религиска нетрпеливост“,
соопштија од Партијата за движење на Турците.
Од ТХП упатуваат и апел до, како што се посочува, сите политички субјекти и слободоумни граѓани да се дистанцираат од ваквите штетни политички активности.
„ТХП продолжува да се залага за општество во кое хармонијата и еднаквоста се во прв план, а нашата земја со многу труд и поддршка на своите меѓународни пријатели ќе стигне до посакуваното членство во ЕУ“,
се нагласува во партиското соопштение во пресрет на собраниската седница на која ќе се одлучува за прашањето за доверба на Владата.