Инаку, Маѓар (43) планира да ги искористи овие избори за да го предизвика и порази Орбан на следното национално гласање закажано за 2026 година. Како адвокат ја обвинуваше владата на Орбан за широко распространета корупција и тврди дека Фидес користел пропагандна машинерија да сее длабоки општествени поделби
Партијата Тиса на Петер Маѓар, кој му стана политички ривал на Виктор Орбан на евроизборите, освои 29,69 отсто од гласовите, според последните објавени резултати на веб-страницата на Европскиот парламент. Партијата Фидес на унгарскиот премиер Виктор Орбан, пак, освои 44,61 отсто од гласовите, што претставува значително помалку од она што го предвидувале анкетите. Со тоа, обезбеди 11 места во Европскиот парламент од вкупно 21 место за Унгарија во законодавниот дом на Европската унија, пренесува Асошиејтед прес.
Според анализите, партијата Фидес само еднаш во последните две децении на евроизборите освоила помалку од 50 отсто од гласовите, а на изборите во 2004 година освоила 47,4 отсто од гласовите.
Според анализите на „Политико“, овој резултат се смета за голема победа за Маѓар, а голем неуспех за Орбан.
Петер Маѓар, поранешен функционер на партијата Фидес и поранешен сопруг на поранешната унгарска министерка за правда Џудит Варга, според анализите, се смета дека ги охрабрил и ги поттикнал гласачите со неговите добри говори наменети за корупцијата за, како што посочувал, на режимот на Орбан.
Тој ветил и дека ќе повлече милијарди од фондовите на ЕУ наменети за Унгарија, кои Брисел во меѓувреме ги замрзна поради загриженоста за владеењето на правото во Унгарија.
„Ова е Ватерло за Орбан, почеток на крајот“,
изјавил Маѓар по првичните резултати.
Инаку, како што пишува АП, Маѓар (43) планира да ги искористи овие избори за да го предизвика и порази Орбан на следното национално гласање закажано за 2026 година. Како адвокат ја обвинуваше владата на Орбан за широко распространета корупција и тврди дека Фидес користел пропагандна машинерија да сее длабоки општествени поделби.
„Денес на секој Унгарец му стана јасно дека никој повеќе не треба да се плаши во Унгарија. Затоа што не сме 100, не сме 1 000, туку неколку милиони“,
изјавил Маѓар.
Орбан на тоа возвратил дека тој и неговата партија освоиле важна победа во тешка битка. Додека зборувал со своите приврзаници, постојано повторувал дека ги победил противниците.
„Денеска ја победивме старата опозиција, новата опозиција и како и да се вика опозицијата. И повторно и повторно ќе ги победиме“,
рече тој.
Гласањето во Унгарија за евроизборите забележало висока излезеност, при што 58,7 отсто од гласачите излегле да гласаат во неделата, во споредба со 43,4 отсто на изборите за ЕУ во 2019 година.
Додека Фидес доминира со унгарската политика од 2010 година, многумина Унгарци се незадоволни од тоа како се управува со земјата. Длабоката економска криза и неодамнешната серија скандали со политичарите на Фидес ја потресоа партијата, која се смета за поддржувач на семејните вредности и на христијанскиот конзерватизам.