Сите во Собранието се за НАТО, ама си испраќаат отровни стрели
Со 114 гласа „за“ парламентот попладнево го ратификува Северноатлантскиот договор.
По повод ратификацијата на Северноатлантскиот договор во македонскиот парламент, од собраниската говорница се обрати и лидерот на ДУИ, Али Ахмети.
Во своето можеби прво обраќање од собраниската говорница по речиси 18-годишен стаж како пратеник, Ахмети изрази благодарност до сите меѓународни и домашни политички фактори кои придонеле за остварување на стратегиската цел на земјава – членството во НАТО.
Претходно, претседателот Стево Пендаровски изјави дека во изминатите 27 години, откако тогашниот парламент донесе одлука за стапување во НАТО, Македонија помина низ многу искушенија, но и низ безбедносна криза, ама стратегиските правци на државата останаа исти. Тој го истакна значењето на договорите со Грција и Бугарија за деблокада на евроатлантските перспективи на земјата.
Предлог-законот за ратификација на Северноатлантскиот договор во декември го донесе владата на Зоран Заев, но денеска во парламентот за законот зборуваше техничкиот премиер Оливер Спасовски. Тој истакна дека по промената на власта во 2017 година Владата презеде низа иницијативи што и го отворија патот на земјата кон полноправно членство во НАТО и почнување преговори со ЕУ.
Претседателот на парламентот Талат Џафери истакна дека овој Собраниски состав успеа да покаже државничка свест и грижа за иднината, така што ги надмина сензитивни моменти и помогна за полноправното членство во НАТО.
Со критичен тон кон владејачкото мнозинство настапи координаторот на ВМРО-ДПМНЕ, Никола Мицевски. Тој рече дека се наметнува лажен впечаток дека ВМРО-ДПМНЕ не е за НАТО поради Преспанскиот договор. Но, како што рече, ВМРО-ДПМНЕ е партија која ги признава реалноста и законитоста и која во 2008 година, од позиција на власт, ги постигна стратегиските договори за партнерство со САД и Турција.
Нола Исмајлоска од независната пратеничка група цитираше членови од Статутот на ВМРО-ДПМНЕ кои го посочуваат членството во НАТО како стратегиски приоритет на државата. Таа ги наброи имињата на сите осум пратеници што беа исклучени од пратеничката група на ВМРО-ДПМНЕ, посочувајќи дека се горди што со гласањето за уставните измени придонеле за членството на земјава во НАТО.
Дневниот ред на денешната свечена собраниска седница беше утврден со 114 гласа од сите присутни пратеници во македонското Собрание, кое брои 120 членови.
По ратификацијата, пред Собранието беше подигнато знамето на НАТО.
Сепак, ратификацијата на договорот ќе биде со одложено дејство, додека и шпанскиот парламент не го ратификува Протоколот за нашиот влез во Алијансата, како 30. членка.
Се очекува овој парламентарен состав, до распуштањето, да го донесе и законот за одбрана, кој е двотретински, а ВМРО-ДПМНЕ се противи на промена на името на Армијата во Армија на Северна Македонија. Во парламентот не се исклучува можноста седницата на чиј дневен ред е новиот закон за одбрана да биде закажана уште вечерва, односно веднаш откако знамето на НАТО ќе се развее пред македонскиот парламент.
*Поврзана вест:
И „одметнатите“ и „верните“ на ВМРО-ДПМНЕ „за“ членство на Северна Македонија во НАТО