Папата рече дека вештачката интелигенција претставува важна промена за човештвото, но ја истакна потребата внимателно да се следи технологијата што постојано се развива
Папата Франциск стана првиот папа кој се обрати на самитот на Г7, предупредувајќи ги светските лидери дека на вештачката интелигенција никогаш не смее да ѝ се даде приоритет пред човештвото.
Папата рече дека вештачката интелигенција претставува важна промена за човештвото, но ја истакна потребата внимателно да се следи технологијата што постојано се развива со цел да се зачува човечкиот живот и достоинство.
„Ниту една машина не треба да го одземе животот на човечко суштество. Би го осудиле човештвото на безнадежна иднина ако им ја одземеме способноста на луѓето да одлучуваат за себе и за своите животи, осудувајќи ги да зависат од изборот на машините“,
рече тој, додавајќи дека луѓето не треба да дозволат моќните алгоритми да ја одредат нивната судбина.
Папата Франциск ја призна амбивалентноста околу вештачката интелигенција, велејќи дека таа може да го инспирира и прошири пристапот до знаење ширум светот.
„Но, во исто време, тоа може да донесе поголема неправда меѓу напредните земји и земјите во развој или меѓу доминантните и останатите општествени класи. Од сите зависи дали ќе ја користат вештачката интелигенција на добар начин, но одговорност на политиката е да создаде услови таквата добра употреба да биде можна и корисна“,
додаде тој.
Папата Франциск денеска со хеликоптер пристигна во јужноиталијанското одморалиште „Борго Ењација“, со што стана првиот папа што учествувал на Самитот на Г7.
Самитот Г7 ги собира лидерите на САД, Германија, Велика Британија, Франција, Италија, Канада и Јапонија. Покрај тоа, италијанската премиерка Џорџа Мелони, домаќин на самитот, покани 10 други нации да се приклучат на разговорите во петок, вклучително и премиерот на Индија и претседателите на Турција и Кенија.
Во последната изјава денеска, Г7 соопшти дека ќе развие план за предвидување на идните вештини и потреби за образование за да се искористи очекуваната револуција на вештачката интелигенција.