Папата Франциск е негативен на коронавирусот, пишуваат двата италијански весника „Месаџеро“ и „Фато Котидиано“.
Тие објавија дека поглаварот на Римокатоличката црква е тестиран вчера, откако истиот ден беше откриено дека е заразен еден свештеник кој долги години живее во резиденцијата на папата во Ватикан.
Тестирањето е извршено за сите лица што работат во Куќата на Света Марта, особено за секретарите на папата. Сите резултати биле негативни, пишуваат весниците повикувајќи се на внатрешни извори во Ватикан.
Светата столица не ја потврди службено оваа информација, како што не го коментираше ниту првото тестирање на папата Франциск на почетокот на март, кога тој имаше настинка.