Според програмата карневалот ќе биде составен од две 90-минутни програми, вечерва од 19 часот и утре, недела од 17 часот
Додека Рио де Жанеиро и Ница ги откажаа карневалите годинава поради пандемија, организаторите на оној во Венеција, одлучија тој сепак да се одржи во духот на новата нормалност – преку Интернет.
Според програмата карневалот ќе биде составен од две 90-минутни програми, вечерва од 19 часот и утре, недела од 17 часот.
Поголемиот дел од програмата во живо се одвива во палатата Вендрамин-Калерги на Големиот канал, музеј на композиторот Ричард Вагнер.
Вториот дел од интернет-изданието на Карневалот ќе започне на 11 февруари и ќе трае до 16 февруари.
Оваа година нема фестивалска атмосфера во градот, а времето е сиво и магливо, пренесуваат медиумите.
Обично, во италијанскиот град има стотици илјади луѓе, кои ги гледаат парадите на гондоли и огнометот.
Еден од најважните настани во Венеција и минатата година не се одржа во целост, откако претседателот на регионот го прекина на 23 февруари, по избувнувањето на пандемијата.
Италија е една од најпогодените европски земји, а од почетокот на пандемијата има над 2,6 милиони заразени и 90 000 смртни случаи.
Во цела Италија во сила е полициски час, со почеток во 22 часот. Во многу градови, вклучително и во Венеција, кафулињата и рестораните работат само до 18 часот.