Кризата со ковид-19 е прашање кое не познава граници и е приоритет за секоја влада на планетата. САД активно работат заедно со земјите од Западен Балкан, како и со партнерите во Европа за да помогнеме во глобалниот одговор на актуелната глобална закана, истакна американскиот заменик – помошникот државен секретар за Европа и Евроазија, Метју Палмер на он-лајн видеоконференцијата „Дипломатија во кризни времиња и други алатки за влијание во Југоисточна Европа во доба на ковид-19“ што ја организираа Економскиот форум во Делфи и Атлантскиот совет, на која учествува и шефот на нашата дипломатија, Никола Димитров.
Палмер во оваа прилика ја истакна помошта што САД ја даваат на земјите од Западен Балкан, директно од американските граѓани и компании како Кока Кола, Микрософт, ИБМ или преку меѓународните институции за борба со пандемијата каде тие се најголем поединечен контрибутор.
Тој посебно ја истакна компанијата Гугл која како што рече помогнала за креирање на информативен сајт за ковид-19 во Северна Македонија.
Но, тој оцени дека поддршката не е еднонасочна, бидејќи земјите од регионот и помагаат на САД, оценувајќи дека се работи за партнерство и солидарност.
„САД се во регионот и во Европа и стојат рамо до рамо со своите партнери и сојузници и активно работат за заеднички одговор на актуелниот предизвик со пандемијата на Ковид-19“,
истакна Палмер.