Претседателот на Словенија и шефот на дипломатијата на Франција, на средба во Љубљана, се согласија дека треба да се направат напори да се избегне поделба меѓу Истокот и Западот во ЕУ
Словенечкиот претседател Борут Пахор и министерот за надворешни работи на Франција Жан-Ив Ле Дријан, на средба во Љубљана, повикаа да се направат напори да се избегне поделба меѓу Истокот и Западот во Европската Унија, „за железната завеса да не биде заменета со кадифена завеса“.
„Ле Дријан се согласи со оценката што Пахор ја даде вчера на 24. годишен состанок на словенечките дипломати во Брдо кај Крањ дека ваквите поделби можат да дојдат во ЕУ и истакна дека тоа мора да се избегне по секоја цена“,
соопшти Кабинетот на словенечкиот претседател.
Соговорниците се согласија претстојната конференција за иднината на ЕУ да се искористи за отворена и силна дебата за заеднички европски проекти за мир и сеопфатен развој, пренесува СТА.
Пахор и Ле Дријан се согласија дека сегашните и идните предизвици можат да се надминат преку искрена соработка и поврзаност.