Очекуваме согласност од Владата за давање под закуп на земјиштето. Веднаш потоа Дирекцијата има обврска да направи подготовка на земјиштето и понатму градежните работи ќе продолжат од самиот инвеститор. Подготвителните работи се веќе завршени, но, кога ќе видиме багери на самата локација, може да кажеме дека градежните работи се почнати, вели директорот Деспотовски
Компанијата која е инвеститор на фабриката за електрични автомобили во Тетово конечно потпиша договор со конзорциум од три домашни градежни компании за изградба на објектот, најави денеска директорот на Дирекцијата за ТИРЗ, Јован Деспотовски.
Според него, сега Владата треба да даде согласност на договорот за закуп на земјиштето, бидејќи зоната е под јавно приватно партнерство меѓу приватниот партнер и носителот на градежните работи.
„Во моментот топката е кај Владата и очекуваме согласност од Владата за давање под закуп на земјиштето. Веднаш потоа Дирекцијата има обврска да направи подготовка на земјиштето бидејќи теренот таму и целата зона е под ризик од поплави. Наша обврска ќе биде да се направи соодветна подготовка на земјиштето, а градежните работи ќе започнат од наша страна и понатаму ќе продолжат од самиот инвеститор. Важно е дека работите се движат, иако тоа не е со динамиката која ја сакаме“,
рече Деспотовски одговарајќи на новинарско прашање на денешното презентирање на резултатите од полугодишната работа на Дирекцијата.
Деспотовски не сакаше да прецизира кога би добиле согласност затоа што, како што рече, кога дава рокови, некогаш се тие многу кратки, но, тоа е и како притисок и останатите да дејствуваат брзо.
„Не мислам дека треба да трошиме време во некакви преписки и мислења бидејќи од другата страна имате приватен сектор кој работи со пари и со време“,
рече тој надевајќи се дека во наредните неколку недели Владата ќе ја даде согласноста.
Во овој дел, како што вели Деспотовски, подготвителните работи се веќе завршени, но, како што вели тој, кога ќе видиме багери на самата локација, може да кажеме дека градежните работи се почнати.
Најавите дека електрични возила ќе се произведуваат во тетовската Технолошко-индустриска развојна зона дојдоа уште во август минатата година кога беше поставен и камен-темелникот за новата фабрика од автомобилската индустрија.
Од Владата тогаш најавија дека мултимилионската инвестиција од „НЕКСТ.Е.ГО МОБИЛЕ“, Ахен, Германија во ТИРЗ Тетово ќе отвори 3–4 000 нови работни места.
Предвидено беше изградбата на фабриката да започне за 6 до 8 недели по помпезната најава. Но, на локацијата сѐ уште има само камен-темелник.
Во април годинава, „360 степени“ објави дека на локацијата не се изведуваат градежни работи, а од надлежните институции го побара одговорот зошто е тоа така. Деспотовски тогаш рече дека инвеститорот сега бара градежници.
„360 степени“ тогаш се обрати до фирмата „Еколог“, која е локалниот партнер на инвеститорот, германската компанија „Е-го“. Но, немаше одговор на прашањата – зошто доцни стартот, дали инвестицијата е одложена, кога ќе почне градбата и производството?