Одлуката на Владата доаѓа откако цената кај приватните субјекти достигна околу 4 700 денари за буково и околу 4 800 денари за дабово дрво од кубен метар
Владата на денешната седница, на предлог на Министерството за економија, донесе одлука за определување на највисока трговска маржа како посебен услов во трговијата за огревно дрво од даб, огревно дрво од бука и пелети за огрев. Согласно одлуката, највисоката трговска маржа за овие производи за сите трговци се утврдува во висина најмногу до 10 отсто, објави министерот за економија Крешник Бектеши.
Во соопштението се вели дека висината на трговска маржа, која ќе биде најмногу до 10 проценти за наведените стоки, ќе важи за сите трговски друштва и трговци поединци кои учествуваат во трговскиот синџир во трговијата на мало, а транспортот за испорака на стоките до крајните потрошувачи не се пресметува во висината на трговската маржа.
„Причината за ограничување на трговската маржа се заснова на усогласување на разликите во цените кои сега се присутни во трговијата на мало, односно при продажба на огревно дрво и пелети за огрев“,
се вели во соопштението.
Одлуката на Владата доаѓа откако цената кај приватните субјекти достигна околу 4 700 денари за буково и околу 4 800 денари за дабово дрво од кубен метар.
Директорката на Државниот пазарен инспекторат Анета Симеска-Димоска минатата недела во изјава за Канал 5 рече дека во периодот од 22 до 28 јули низ целата држава се направени 131 инспекциски надзор кај трговци со пелети и дрва, при што биле утврдени седум прекршоци, а меѓу нив имало и фирми што немале дозвола за вршење на оваа дејност.
Претходно, поради недостиг на енергенти во Европа и енергетската криза на светскиот пазар, Владата го ограничи извозот на дрво и пелети од земјава.
Слична одлука донесе и српската влада која пред извесно време го забрани извозот на пелети, а вчера ја ограничи цената на 320 евра за тон.
„360 степени“ на почетокот на јуни предупреди дека во периодот што следува се очекува голем пораст на цените на пелети и огревно дрво.