Во периодот од 22 до 28 јули низ целата држава се направени 131 инспекциски надзори кај трговци со пелети, при што биле утврдени 7 прекршоци, а меѓу нив имало и фирми што немале дозвола за вршење на оваа дејност, пренесува Канал 5 ТВ.
Директорката на Државниот пазарен инспекторат (ДПИ), Анета Симеска Димоска, во изјава за Канал 5, рече дека при инспекциите е утврдено дека цената на пелетите се движи од 15 до 26 денари по килограм или од 220 до 390 денари за вреќа од 15 килограми во зависност од палетите.
„Кај два субјекти утврдено е дека за објектот, односно местото каде што се врши трговијата, нема доставено пријава до Државниот пазарен инспекторат за отпочнување со вршење на дејност, за што, секако, има преземено мерки, меѓутоа, секако веќе доставена е пријава до Државниот пазарен инспекторат“,
вели за Канал 5, в.д. директорката на ДПИ, Анета Симеска Димоска.
Поскапувањето на струјата, парното и пелетите довеле до зголемена побарувачка на огревно дрво, а според пазарниот инспекторат, цената кај приватните субјекти изнесува околу 4 700 денари за буково дрво и околу 4 800 денари за дабово дрво од метар кубен. Од ДПИ велат дека неправилности биле пронајдени и кај овие продавачи, меѓу кои се лоцирани и диви продавачи на огревно дрво.
„Кај голем број на складови кои што ги имаме како информација дека постојат, каде што имаме утврдено дека дел од тие складови каде што се врши продажба на огревно дрво имаат нерегистрирана дејност. Најдени се одредени неправилности, не само по однос на нерегистрирана дејност туку и по други основи каде што сме надлежни како ДПИ“
вели в.д. директорката на ДПИ, Анета Симеска Димоска.
Годинава се забележува зголемување на побарувачката на пелети што доведе до проблеми за набавка на неопходните количини. Вицепремиерот за економски прашања Фатмир Битиќи претходно порача дека трговците на пелети што ќе се обидат да направат вештачки недостиг и ги кријат пелетите со цел да ги продадат за поголема цена ќе бидат јавно објавени.