„Со жалење морам да констатирам дека покрај пратениците од ВМРО-ДПМНЕ, на блокадата ѝ се приклучија и ДУИ и ДПТ, за кои се надевам дека имаат силни аргументи што ќе ги споделат со нас и јавноста, затоа што ваквото несериозно однесување од овие три партии не е дозволено во законодавниот дом“, рече денеска претседателот на Комисијата за политички систем Александар Кирацовски, откако поради немање кворум ја откажа седницата на оваа собраниска комисија на чиј дневен ред беше предлог законот за поништување на лустрацијата.
Тој не кажа кога седницата ќе биде презакажана, туку само рече дека тоа ќе се случи тогаш кога ќе биде обезбеден кворум и изрази надеж дека ќе се изнајде решение за блокадата.
Според него, присуството на министерката за правда Рената Дескоска, која пратениците од ВМРО-ДПМНЕ ја повикаа лично да го образложи предлог законот, е ирелевантно.
Кирацовски најави координација меѓу владините партнери на СДСМ и ДУИ на повисоко ниво, откако пратениците на владиниот коалициски партнер не се појавија на седницата.
Пратеникот од ВМРО-ДПМНЕ Илија Димовски рече дека владејачката партија немала аргументи за укинувањето на лустрацијата.
„Никој освен СДСМ како наследник на тој претходен режим не сака да даде поддршка на тој закон. Нема европска земја која не поминала низ лустрацијата. Ние сме тука, ако Кирацовски ја закаже седницата во 11 часот навечер, ќе отидеме и со аргументи ќе се спротивставиме. Македонија помина низ најмеката лустрација“, рече Димовски на прес конференција.
Министерката Дескоска смета дека ВМРО-ДПМНЕ бара дополнителни основи за опструкција и оцени дека деловничките обврски се исполнети, а Комисијата треба да продолжи со работа.
Најавата на ВМРО-ДПМНЕ дека ќе го блокира предлог-законот за поништување на лустрацијата е само уште еден доказ дека во оваа партија ништо не е променето, изјави пратеничката на СДСМ, Снежана Калеска-Ванчева.
Наместо да се оградат, рече таа, Христијан Мицкоски и дел од пратениците на ВМРО-ДПМНЕ ги бранат бруталните злоупотреби на процесот на лустрација зад кои се криеше „политички и криминално мотивираната фамилија на режимот“.
Претходно, пратеникот од ВМРО-ДПМНЕ, Зоран Илијоски, на прес-конференција во Собранието соопшти дека опозицијата е против поништување на лустрацијата, најави амандмани за спречување на овој предлог-закон да се изгласа и ја обвини власта дека партијата на аболираниот Зоран Заев прави аболиција на кодошите.
На крајот на декември Владата го усвои предложеното законско решение на Министерството за правда со кое одлуките од лустрацијата и правните последици ќе станат ништовни.