ВМРО-ДПМНЕ да престане да бара дополнителни основи за опструкција, изјави министерката за правда Рената Дескоска, откако на денешната собраниска Комисија за политички систем пратениците на опозициската ВМРО-ДПМНЕ побараа предлог-законот за поништување на лустрацијата да го образложи лично таа.
„Деловничките обврски се исполнети и Комисијата треба да продолжи со работа, а ВМРО-ДПМНЕ да престане да бара дополнителни основи за опструкција“,
вели Дескоска.
Претседателот на собраниската Комисија за политички систем Александар Кирацовски денеска двапати го одложи почетокот на седницата на која на дневен ред е законот за поништување на лустрацијата – прво по барање на пратениците на ВМРО-ДПМНЕ предложениот текст пред нив да го образложи министерката за правда Дескоска, а потоа и поради немање кворум.
Кирацовски ги повика пратениците од ВМРО-ДПМНЕ да дојдат на следното продолжение.
Најавата на ВМРО-ДПМНЕ дека ќе го блокира предлог-законот за поништување на лустрацијата е само уште еден доказ дека во оваа партија ништо не е променето, изјави пратеничката на СДСМ, Снежана Калеска-Ванчева.
Наместо да се оградат, рече таа, Христијан Мицкоски и дел од пратениците на ВМРО-ДПМНЕ ги бранат бруталните злоупотреби на процесот на лустрација зад кои се криеше „политички и криминално мотивираната фамилија на режимот“.
„На ниту еден можен начин ВМРО-ДПМНЕ и Христијан Мицкоски не се дистанцираат од грешките и злоделата на Никола Груевски. Напротив, ги штитат, ги бранат, ги чуваат,
рече Калеска-Ванчева на прес-конференцијата додавајќи оти ова е најдобар доказ дека Груевски му е шеф на Мицкоски и дека опозициската партија е сè уште нереформирана.
ВМРО-ДПМНЕ, потенцира таа, ја злоупотреби лустрацијата за политички, партиски, па дури и за лични цели.
„Тоа можевме да го слушнеме во прислушуваните материјали, каде што високи функционери на ВМРО-ДПМНЕ, меѓу кои Милошоски, Јанкуловска, Груевски… си нарачуваа лустрациски процеси по желба. Бруталната пресметка со неистомислениците и кршењето на Законот за лустрација кои свесно ги спроведуваа ВМРО-ДПМНЕ и фамилијата се срамни и недозволиви и таа неправда мора да се исправи“, рече Калеска-Ванчева.
Претходно, пратеникот од ВМРО-ДПМНЕ, Зоран Илијоски, на прес-конференција во Собранието соопшти дека опозицијата е против поништување на лустрацијата, најави амандмани за спречување на овој предлог-закон да се изгласа и ја обвини власта дека партијата на аболираниот Зоран Заев прави аболиција на кодошите.
На крајот на декември Владата го усвои предложеното законско решение на Министерството за правда со кое одлуките од лустрацијата и правните последици ќе станат ништовни.