Опозициската ВМРО-ДПМНЕ ќе се обиде со амандмани да го спречи носењето на законот со кој се поништува лустрацијата, соопшти денеска пратеникот од ВМРО-ДПМНЕ, Зоран Илијоски.
Тој обвини дека со ваквото решение власта сака да ги аболира, како што ги нарече кодошите, термин што претходната власт го користеше за лицата кои ги лустрираше. Илијоски од прес-конференцијата во Собранието повторно го употреби и терминот „аболиран криминалец“ за лидерот на СДСМ, кој го употребуваше за време на изборната кампања за претходните избори.
„Партијата на аболираниот Зоран Заев прави аболиција на кодошите. Децата на кодошите си ги амнестираат своите предци. Со СДСМ, Македонија стана единствена земја во која нема лустрација за кодошите од комунистичкиот режим кои изградија цели кариери врз база кодошење на македонските патриоти, но и недолжни граѓани. Македонија е единствена држава во Европа во која кодошите на комунистичкиот режим кои местеа луѓе и уништуваа човечки судбини, наместо осуда, за тоа ќе добијат и пари од државата. СДСМ им овозможува на десетици кодоши, кои зацрнија цели семејства, сега да добијат пари од буџетот, кој го полнат децата на некогашните нивни жртви. Во ЕУ не се оди со остатоците од комунизмот преобразени во демократи. Соработник на режим, не може да биде демократ. Македонија наместо европска држава станува како Северна Кореја каде што со декрет на Заев го простува тоа што го правеле соработниците на тајните служби“,
рече Илијоски.
Според него, законот што СДСМ го предлага е во целосна спротивност на европските вредности и демократските принципи и затоа ВМРО-ДПМНЕ нема да го поддржи и ќе се обиде со амандмани да го спречи донесувањето.
Законот за поништување на лустрацијата денеска влегува во собраниска процедура и ќе биде разгледан од членовите на собраниската Комисија за политички систем и односи меѓу заедниците.
На крајот на декември Владата го усвои предложеното законско решение на Министерството за правда со кое одлуките од лустрацијата и правните последици ќе станат ништовни.