Огорчен сум од чинот во кој, како што изгледа, станува збор за психолошки збунет поединец кој дејствувал сам, рече Армин Шустер, министер за внатрешни работи на германската покраина Саксонија, каде што се наоѓа градот Дрезден
Четириесетгодишниот маж кој денеска вооружен држеше заложници во трговски центар во германскиот град Дрезден починал од повредите здобиени во полициската акција, јави Ројтерс.
„Огорчен сум од чинот во кој, како што изгледа, станува збор за психолошки збунет поединец кој дејствувал сам“,
рекол Армин Шустер, министер за внатрешни работи на покраината Саксонија, каде што се наоѓа градот Дрезден.
Полицијата соопшти дека ставила крај на заложничката драма во источногерманскиот град Дрезден откако го евакуирала трговскиот центар во историскиот центар на градот и го затворила познатиот божиќен пазар „Стризелмаркт“.
Информативниот портал „ТАГ 24“ претходно објави дека според соопштение на полицијата се верува дека 40-годишен Германец ја убил својата 62-годишна мајка во станбена зграда во областа Прохлис во Дрезден, југоисточно од центарот на градот.
Пред заложничката криза, 40-годишникот пукал во канцелариите на Радио Дрезден и се обидел да ја пробие вратата.
Осомничениот се обидел да упадне во канцелариите, но не можел да помине низ вратата, изјавил извршниот директор Тино Утаси за ДПА.
Откако не успеал да влезе во просториите на радио станицата, осомничениот пукал кон вратата.
„За среќа, персоналот беше присебен, истрча преку другиот излез и избега“,
рекол Утаси.