Засилена комуникација со Бугарија и интензивни средби на работните групи најави министерот за надворешни работи Бујар Османи. Како што соопшти на денешната прес-конференција , Османи со бугарскиот колега Милков веќе договориле заеднички настан, а идната недела тим од двете министерства ќе направи календар за фиксни средби на секторските работни групи. Според шефот на дипломатијата, колку повеќе е оставен простор без комуникација со бугарската страна, се отстапува од траекторијата исцртана од јули годинава.
„Целта беше не само одржување на нормална комуникација, враќање на агендата, но и еден тип на превентивна дипломатија затоа што почнаа да не ми се допаѓа трендот и динамиката на односите со Република Бугарија, посебно по големиот исчекор кој го направивме во јули оваа година. Бидејќи таму нема политичка влада сакав да се видам и со службената, но и со политичките партии“
рече Османи.
Министерот Османи информира дека се договориле да се одржи бизнис форум со Бугарија, кој ќе се одржи на почетокот на декември во Скопје. Очекуваат голем број бизнисмени и компании од Бугарија заедно со министерот Милков да дојдат во Скопје. Со тоа, како што рече, ќе одбележиме една милијарда евра трговска размена оваа година.
„И таму и овде има работни групи за следење на протоколот. Тоа што останува обврска е да се утврди календарот за чествување на заедничките историски личности, тие пет кои ги утврдивме за заеднички историски личности, треба да се утврди календар согласно протколот за 2023-2024 година, ќе видиме овој тим кој го презентиравме да може да почнат разговори во соработка со историската комисија , иако тоа е работа на двете влади да утврдат календари, дали ќе бидат на 5, на 10, или на една година, во зависност од личностите кои се договорени“
порача Османи.
Османи додаде дека за една личност веќе е јасно, а тоа е 24 мај – чествувањето на Свети Кирил и Методиј, во Рим, но ,останува за Св. Климент, Св. Наум и Самоил да се утврди таков календар. На средбите во Бугарија се зборувало и за отворањето на македонски културен центар во Благоевград, а Османи нагласи дека се отворило и прашањето за провокациите кои се однесуваат на прашањата на идентитетот и посебноста на јазикот.
„Немаше состанок посебно со лидерите на политичките партии во Парламентот на кој не се задржав значително токму во овој дел, кога тие изјави кои се однесуваат на посебноста, на идентитетот и на јазикот и укажав дека колку повеќе и ако воопшто има разговори по тоа прашање, толку ќе се стесни просторот за било каква нормална комуникација во однос на другите прашања. Мислам дека сите ја разбраа пораката колку е тоа сензитивно и колку треба да внимаваат по однос на прашања кои се однесуват на теми како идентитет, засебност и јазик,“
изјави Османи.