Очекуваме дека извештајот ќе биде позитивен и ќе процени дека има континуитет во напредокот и посветеноста на реформите, вели министерот за надворешни работи Бујар Османи во интервју за „Утрински брифинг“
Содржината на извештајот е сè уште под ембарго, но имаме увид. Извештајот помалку се осврнува на изборниот амбиент, на тековната година и дава препораки. Има нова методологија според која извештај даваат и амбасадорите на земјите членки во земјата. Очекуваме дека извештајот ќе биде позитивен и ќе процени дека има континуитет во напредокот и посветеноста на реформите, вели министерот за надворешни работи Бујар Османи во интервју за „Утрински брифинг“ пред објавувањето на Извештајот на ЕК за нашата земја.
„Очекувам и во однос на кластерите по области да има напредок. Очекувам дека Комисијата ќе ги потврди и напорите што ги вложивме за решавање на односите со Софија. Одиме низ опасен терен, а знаеме дека без европскиот кредибилитет овој регион може да влезе во опасни води. Очекувам нотирање на успешниот попис и демократските избори, кои поминаа без инциденти, што е знак за сериозна демократска држава и е многу тешко да се изведе во мултиетничка држава“,
вели Османи.
Во врска со односите со Бугарија, која е членка на ЕУ и чие мислење има влијание за нашиот евроинтеграциски пат, Османи признава дека предизвикува проблем, но истакнува дека разговорите продолжуваат.
„Непредвидливоста на Бугарија ни предизвикува проблем. Правевме планови за првите, вторите, третите избори во Бугари, но неизвесно е дали ќе имаат политичка влада. Сега има мал застој во разговорите, но за неколку дена ќе има средба на заедничката комисија, по што ќе следи средба, четврта по ред, меѓу двете МНР, а ако има напредок ќе се сретнеме на министерско ниво“,
вели Османи.