При посетата на Македонците од Голо Брдо во Албанија, министерот Османи истакна дека Северна Македонија има одличнa соработка со албански институции, изразувајќи благодарност за нивната поддршка за Македонското национално малцинство во Албанија
Министерот за надворешни работи Бујар Османи денеска ја посети месноста Голо Брдо во Албанија, при што оствари средба со Македонците од овој крај.
Во таа насока, Османи на својот фејсбук-профил истакна дека Северна Македонија преку конкретни проекти и соработка обезбедува поддршка за заштита и промоција на нивните јазични и културни особености во Албанија.
„Имаме одличнa соработка со албански институции и благодарни сме за нивната поддршка за Македонското национално малцинство во Албанија“,
пишува Османи на фејсбук.
Меѓу другото, министерот додава дека се потребни дополнителни заеднички напори со Албанија за промена на режимот на работа на граничниот премин Џепиште-Требиште со што, како што вели, би се подобрила економската и трговска соработка во овој крај, како и слободата на движење на локалното население од двете страни на границата.
Ова прашање, посочува министерот Османи, било покренато како едно од клучните прашања од интерес на македонското население во областа Голо Брдо.
Посетата на Македонците во Албанија министерот Бујар Османи ја најави вчера на прес-конференција одговарајќи на новинарско прашање во однос на актуелните тврдења на претставници од македонската заедница во Албанија дека се соочуваат со притисоци да се попишат како Бугари на претстојниот попис закажан во октомври.
Османи, како што информира МНР, ќе има средби во Требиште и Голо Брдо, а потоа ќе пристигне во регионот на Пустец.