Кажувам јавно дека по затворањето на тој простор ќе има многу малку капитал и енергија кој било да се посвети на ова прашање како што се посветувавме сега, рече Османи
Она што досега го постигнавме во односите со Бугарија е најдоброто можно решение. Мислам дека во овој процес постигнавме многу во однос на она што го исцрта Декларацијата на Собранието и она што како простор за маневар ни го даде. Но прозорецот на можности за кратко се затвора, за неколку недели, и кажувам јавно дека по затворањето на тој простор ќе има многу малку капитал и енергија кој било да се посвети на ова прашање како што се посветувавме сега.
Вака министерот за надворешни работи Бујар Османи одговори на прашањето за тоа што досега е постигнато во решавањето на проблемот со Бугарија која треба да го отвори патот за почеток со преговорите со ЕУ.
„Знаете, овие шест месеци, во овие сто дена Влада имаше една доминантна тема. Односите со Република Бугарија. Овие министри можеби во нивните образложувања ќе кажуваат за други проекти, но тие повеќе се среќаваа со бугарските министри отколку со своите колеги овде. Затоа што се вложивме во еден процес кој ќе значи долгорочно надминување на проблемот. Сметам дека нема доволно енергија и капитал оваа влада да се посвети на една тема откако ќе се затвори овој прозорец на можноста, ќе мора да се занимаваме со внатрешните прашања“,
појасни Османи, кој зборуваше на панелот на министрите во рамки на Форумот 100 дена Влада.
На прашањето што ќе значи тоа, Османи рече дека ЕУ сега треба да одлучи што понатаму, но дека топката веќе не е во нашиот двор туку во Софија, затоа што од наша страна е направено сè што е можно да се направи како конструктивен партнер во овие разговори.
„Секако, никогаш нема да има алтернатива од ЕУ, затоа што ние вредносно, културолошки, географски и во кој било аспект сме дел од Унијата. Но, процесот веќе не зависи од нас туку од тоа дали Унијата ќе преземе стратегиско лидерство во регионот во овој новосоздаден геополитички контекст каде што веќе не е прашање на вредности туку на безбедност и сигурност“,
истакна Османи.
На самиот почеток на Форумот на тема односите со Бугарија и евроинтеграциите говореше и премиерот Димитар Ковачевски.