Од Берлин, министерот за надворешни работи ќе отпатува директно за Софија
Шефот на дипломатијата, Бујар Османи, утре ќе патува за Германија, со цел да се реафирмира германската позиција во однос на итната потреба од деблокада на пристапниот процес на Северна Македонија со ЕУ.
Како што најавија од Министерството за надворешни работи, Османи ќе се сретне со државната министерка на Германија надлежна за Европа, Ана Лирман, а ќе има средби и во Бундестагот со Михаил Рот кој е претседател на Комисијата за надворешни работи и со Антон Хофрајтер, претседател на Комисијата за ЕУ прашања.
Во агендата на Османи се и средби со советниците на германскиот канцелар Олаф Шолц и тоа со Јенс Плотнер и Ундине Руге кои го советуваат Шолц за надворешна политика односно за ЕУ прашања.
„Целта на посетата е да се реафирмира германската позиција во однос на нашето европско досие и поддршката во однос на итната потреба од деблокирање на пристапниот процес со ЕУ. Се очекува на средбите да бидат разменети мислења и за регионалната динамика, како и за безбедносната состојба на европскиот континент, во светло на новите геополитички предизвици“,
велат од МНР.
Од Берлин, министерот за надворешни работи ќе отпатува директно за Софија.