Среќна околност е што се донесе одлуката за почнување преговори бидејќи на таков начин сега Северна Македонија има пристап до Европскиот солидарен фонд, рече вицепремиерот Бујар Османи.
„Еврокомесарот Оливер Вархеји потврди дека ги разгледува можностите за вклучување на земјата во пошироките механизми на ЕУ за справување со пандемијата од ковид-19, а тука е пред сè Европскиот солидарен фонд. Тој е создаден некаде во 2012 година за справување со елементарни непогоди и пандемии за земјите членки и за земјите преговарачи. Среќна околност е што добивме одлука за почнување преговори, со што добиваме право да имаме пристап во овој фонд, право кое го немаме како земја кандидат. Затоа очекуваме формализација на одлуката во текот на денешниот и утрешниот ден од страна на Европскиот совет, по што би се пратило писмо во статус на земја-преговарач за пристап до фондот“,
рече Османи.
Тој потсети и на помошта што ќе ја добие Северна Македонија од Европската Унија во висина помеѓу 65 и 70 милиони евра, нешто за што вчера и Вархеји му испрати писмо на премиерот Оливер Спасовски.
Османи рече дека по првичниот шок од пандемијата, ЕУ почнала да ги активира механизмите за помош и тоа можеби некому му изгледа како бавна реакција, но според него е навремена.