Министерот за надворешни работи во интервју за Канал 5 најави дека очекува утре да се види со неговата на бугарска колешка Теодора Генчовска, и вели дека разговорите кои ги водеа изминатиот викенд во Скопје биле добри и конструктивни. Шефот на дипломатијата додаде оти „комуницирале во детали“, разговарале за сите прашања, односно за четирите прашања во пакетот и оцени оти имале напредок и разбирање
Османи смета дека работата на комисијата зависи од севкупната политичка атмосфера и откри дека е утврден принцип кога ќе се објави што досега е договорено – ако не се постигне договор за шест месеци секоја страна унилатерално да објави
Јас не би ги земал изјавите од вчера и денес како официјална политика на Бугарија во однос на прашањето за С Македонија, бидејќи, како што можевме да видиме, предмет на меѓусебни политички расправи беше буџетот, а во јавните настапи нашето прашање стана дел од дневнополитички препукувања, изјави вечерва министерот за надворешни работи, Бујар Османи, во интервју за „Само вистина“ на Канал 5.
Тој најави дека очекува утре да се види со неговата бугарска колешка Теодора Генчовска на состанокот на ПСЈЕ, и вели дека разговорите кои ги водеа изминатиот викенд во Скопје биле добри и конструктивни. Шефот на дипломатијата додаде оти „комуницирале во детали“, разговарале за сите прашања, односно за четирите прашања во пакетот и оцени оти имале напредок и разбирање.
„Нашите позиции се јасни и не си дозволуваме да го комуницираме тоа јавно. Во саботата разговараме, имавме прогрес по некои прашања, по некои има разлики и одлучивме да се вратиме во своите централи. Принципот е ништо не е договорено додека не е се договорено. И тоа е формалната институционална комуникација. Има записници и тие се пренесуваат во двете влади. Јас уште вечерта се сретнав со претседателот и премиерот, до два по полноќ, ги брифирав, добив насоки, се координиравме. И тоа го сметам за формални ставови на Бугарија и од таму би продолжиле на следната средба, а не од изјавите од вчера и денес“,
рече Османи.
Во однос на разговорите кои се водат, вклучувајќи ги и тие од саботата, тој рече дека во нив не ја дефинираат содржината на решението, туку формата.
„Тоа што договаравме во саботата е како да ги имплементираме одлуките кога комисијата ќе донесе одлука, а не за содржината. Се договоривме за дефинирање на минималниот број состаноци на комисијата. Дефинираме процес кој сметаме дека ќе донесе одредени резултати“,
рече Османи и тука посочи еден пример, кој иако рече дека е банален, сепак, го отсликува принципот на разговорите што се водат и кои инсистираат тоа да е што попрецизно:
„Се обидуваме да бидеме попрецизни. Еве еден детал: има пагаграф дека двете земји ќе утврдат институција која ќе го следи говорот на омраза за да не се доведеме во ситуација која ќе биде таа институција, и утврдивме дека тоа ќе бидат Министерствата за надворешни работи за да нема простор за разни интерпретации“,
објасни Османи.
На прашањето, за историската комисија, Османи рече таа можела да продуцира и повеќе резултати, но оти политичкиот контекст преку создавање амбиент ја кочи нивната работа.
„Јас сметам дека работата на комисијата зависи од севкупната политичка атмосфера. Важно е дека двете страни се договараме како да одиме напред и дека ова е начинот преку утврдување на формата за имплементација. Утврдивме принцип кога ќе објавиме што досега е договорено – ако не се постигне договор за шест месеци секоја страна унилатерално да објави“,
рече тој.
Османи беше дециден и дека не е прифатливо ни за нас, ни за ЕУ да влезе во Преговарачката рамка она што се разговара во историската комисија и тоа не може да биде дел од преговарачкиот процес.
Тој вели дека нема потреба македонската јавност да стравува, бидејќи како што вели тие се држат до државната позиција, истакнувајќи дека она што е најважно е дека има целосна доверба меѓу чинителите – претседателот, премиерот, вицепремиерот, министерот за надворешни работи, кои се претставници и на различни политички партии и на различни етнички заедници.
„Ако има еден колатерален позитивен процес, тоа е оваа меѓусебна доверба внатре и граѓаните во тоа се уверија“,
рече Османи.