Вицепремиерот за европски прашања Бујар Османи оценува дека со предложените измени на Изборниот законик за воведување една изборна единица не губи ДУИ како голема политичка партија, туку губат Албанците. Според него реакцијата не се однесува на СДСМ, туку на фактот да не дозволат да се намали бројот на пратеници Албанци заради изборниот модел.
„Вистина е дека една изборна единица повеќе ѝ одговара на ДУИ. Симулацијата што ја има правено СДСМ е точна дека ДУИ добив два пратеника повеќе со една изборна единица отколку со шест изборни единици, меѓутоа истите симулации покажуваат дека вкупниот број на албански пратеници паѓа за осум до 10 пратеника. Да ДУИ добива како голема партија кај Албанците, но вкупниот број албански пратеници паѓа за осум до десет бидејќи во една изборна единица Донтовата формула ги собира гласовите од помалите партии ги дава на поголемите и така паѓа вкупиот број албански пратеници“, изјави Османи.
Тој истакна дека реакцијата на ДУИ воопшто не се однесува на СДСМ, на некакви меѓукоалициски односи, туку се однесува на фактот дека, како што рече, нема да дозволат бројот на пратеници Албанци да падне заради изборниот модел. Токму неговата партијата поднесе речиси 5.000 амандмани на предлог–измените на Изборниот законик.
Овие предлог-измени се затрупани со над 6.000 амандмани. Околу 600 се на ВМРО-ДПМНЕ.
Од оваа партија се против изборниот модел да се менува четири месеци пред избори.
„Она што е најбитно во овој момент е дека измени на изборниот законик во насока на менување на изборниот модел на речиси неполни 2-3 недели пред бирање односно составување на техничка влада којашто треба да ги спроведе изборите, од друга страна на 3 односно 4 месеци неполни пред одржување на парламентарните избори да менувате изборен модел и притоа без консензус на најголемите политички субјекти уште еднаш само го покажува вистинското лице на Заев и СДСМ во однос на тоа како шарлатански и хазардерски ја водат оваа држава“, изјави вчера генералниот секретар на партијата, Игор Јанушев.
Владејачката СДСМ, пак, поддржува една изборна единица и тоа ѝ беше наведено и во изборната програма за последните парламентарни избори во декември 2016. За една изборна единица се и повеќето помали партии, а пред во Собрание да се поднесат предлог-законски измени десетина пратеници од овие партии покренаа и иницијатива за промена на изборниот модел.