Станува збор за иницијатива на украинскиот министер за надворешни работи Дмитро Кулеба, по повод Денот на независноста на Украина, во која се вклучени 13 негови колеги од светот, меѓу кои и Бујар Османи
Шефот на македонската дипломатија во „твитер-изведбата“ на ураинската химна се приклучи со стихот: „Встанем, браття, в бій кривавий від Сяну до Дону“, или во превод на македонски јазик: „Да станеме, браќа, во крвава битка од Сјан до Дон“
Министерот за надворешни работи на Северна Македонија, Бујар Османи, денеска беше дел од група на 13 свои колеги од светот, кои на социјалната мрежа X, претходно Твитер, ја „испеаја“ или, поконкретно, испишаа по еден стих од украинската државна химна.
Станува збор за меѓународна иницијатива по повод Денот на независноста на Украина.
За твитер-верзијата на химната и приклучувањето на шефот на македонската дипломатија, преку соопштение на официјалната интернет-страница, информираа и од Министерството за надворешни работи.
Иницијативата, како што велат оттаму, била на украинскиот министер за надворешни работи, Дмитро Кулеба, која ја поддржале негови колеги од светот, меѓу кои и Османи.
Како иницијатор, токму Кулеба, во твитот објавен денеска попладне, ја почнува нишката од стихови на химната, со првиот кој гласи: „Ще не вмерла України і слава, і воля“.
Македонскиот превод на стихот е:
„Славата и волјата на Украина сè уште не умреле“.
Ще не вмерла України і слава, і воля@thordiskolbrun @Tsahkna @WBHoekstra @GLandsbergis @TobiasBillstrom @Bujar_O @JamesCleverly @MinColonna @ABaerbock @Antonio_Tajani @JosepBorrellF @melaniejoly @SecBlinken
— Dmytro Kuleba (@DmytroKuleba) August 24, 2023
Во објавата тој „тагнува“, односно ги наведува профилите на 13 шефови на дипломатии, меѓу кои и Бујар Османи, кои синхронизирано понатаму се надворзуваат со по еден стих од украинската химна.
Како што може да се забележи од објавата на социјалната мрежа, македонскиот министер за надворешни работи е единствениот од земјите од регионот кој е дел од „твитираната“ верзија на украинската химна.
Меѓу другите се шефовите на дипломатиите на САД – Ентони Блинкен, на Германија – Аналена Бербок, на Франција – Кетрин Колона, и на уште девет други држави кои ја поддржуваат Украина во воената агресија од Русија.
Османи во „твитер-изведбата“ на украинската химна се приклучи со стихот: „Встанем, браття, в бій кривавий від Сяну до Дону“, или во превод на македонски јазик:
„Да станеме, браќа, во крвава битка од Сјан до Дон“.
Од Министерството за надворешни работи велат дека ова е „уште еден симболичен гест кој ја потврдува поддршката што Северна Македонија ѝ ја дава на Украина за заштита и одбрана на нејзиниот суверенитет и територијален интегритет кој е под напад на руската воена агресија“.
Во знак на поддршка, од МНР потсетуваат дека вчера беше поставено и украинското знаме во чест на Денот на државното знаме на Украина.
Претходно денеска, во друга објава на Твитер, украинскиот министрер за надворешни работи го честита Денот на независноста на земјата и по тој повод напиша:
„Среќен Ден на независноста на Украина на сите Украинци во Украина и низ светот! Без разлика дали сте во Европа, Северна или Јужна Америка, Азија, Африка, Австралија или на Блискиот Исток, вие сте дел од Украина. Заедно се бориме за она што е највредно. Нашата независност добиена во битка“.
Happy Ukraine’s Independence Day to all Ukrainians in Ukraine and around the world!
— Dmytro Kuleba (@DmytroKuleba) August 24, 2023
Whether you are in Europe, North or South America, Asia, Africa, Australia, or the Middle East, you are part of Ukraine.
We fight together for what is most valuable. Our battle-won independence.
Украинскиот претседател Володимир Зеленски во својата честитка по повод 32-годишнината од независноста на Украина, објавена на неговиот фејсбук-профил, напиша дека денеска е празник на слободните и на силните луѓе.
„Празник на луѓето со достоинство. Празник на еднаквите. Украински мажи и жени. Сите тие. Во целата наша држава. Ова е вредност за секој од нас. И за ова се бориме. И сите се важни во оваа борба. Затоа што ова е борба за нешто што е важно за секого. Независна Украина“,
напиша Зеленски.
Денот на независноста беше одбележан и во Скопје, со марш кој започна од споменикот „Тарас Шевченко“ во паркот „Жена борец“, а заврши со интонирање на украинската химна пред „Алеја на Украина“.
Одбележувањето во Скопје го организираа Амбасадата на Украина и Здружението на Украинци „Лесја Украинка“.
Пред „Алеја на Украина“ обраќање имаше украинската амбасадорка Лариса Дир, која се заблагодари за помошта што Северна Македонија ја дава за Украина и додаде дека Украинците го бранат своето право на живот, суверенитет, територијален интегритет, како и универзалните човечки вредности.
На одбележувањето пред „Алеја на Украина“ обраќање имаа и градоначалникот на Општина Центар, Горан Герасимовски, и претседателот на Здружението на Украинците „Лесја Украинка“, Олександр Урбанович.
По повод Денот на независноста на Украина беше поставена и изложба со цртежи од украински деца насловена „Децата на војната“, а чии мотиви се запирање на војната.