Денот на независноста на Украина се одбележува на денот кога во 1991 година Украина ја прогласи својата независност од Советскиот Сојуз
Украинскиот претседател Володимир Зеленски денеска, на одбележувањето на Денот на независноста на земјата, излезе со апел за единство пред руската инвазија, што почна пред точно 18 месеци, јави германската агенција ДПА.
Во објавената видео порака Зеленски им се заблагодари на војниците, вработените во вооружувањето, електричарите, новинарите, деминерите, наставниците, лекарите и спортистите за нивните напори и потсети на направените жртви.
„Важен е секој што работи и дава работа на другите. Сите оние кои плаќаат даноци помогнаа да се поддржат вооружените сили и да се обезбеди идната победа“,
рече Зеленски, пренесе ДПА.
Денот на независноста на Украина се одбележува на денот кога во 1991 година Украина ја прогласи својата независност од Советскиот Сојуз.
И покрај одреден успех во контраофанзивата на Украина против руските сили, Москва продолжува да контролира речиси една петтина од територијата на својот сосед, вклучувајќи го и црноморскиот полуостров Крим, што го анектираше во 2014 година, потсетува ДПА.