Вицепремиерот за европски прашања се сретна со министерот советник за Балканот при италијанското МНР, Андреа Касконе
Се остварува иницијативата на Италија за брзо враќање на европските интеграциите во агендата, истакнал вицепремиерот за европски прашања Бујар Османи на денешната средба со министерот советник и генерален директор за Балканот при Министерството за надворешни работи на Италија, Андреа Касконе, во рамки на неговата посета на земјава.
„По длабокото разочарување од октомврискиот самит, иницијативата на премиерот Џузепе Конте, за брзо враќање на процесот на проширување високо на агендата на ЕУ денес во целост е исполнета. Пред нас имаме практично усогласена рамка за новата методологија и извештај на Европската комисија, кој нуди можност на претстојниот Самит на ЕУ да се исправи грешката од минатата година“,
истакна Османи упатувајќи благодарност до Касконе за поддршката од Италија за Северна Македонија и воопшто за процесот на интеграција на регионот во ЕУ.
За време на разговорот, како што соопшти Секретаријатот за европски прашања, двајцата соговорници заеднички констатирале дека двете земји имаат одлични билатерални односи во многу области од заемен интерес, засновани на меѓусебна доверба, почит и разбирање на повеќе нивоа, а воедно е изразена и заедничка согласност за европските перспективи на целиот Западен Балкан.